Псалтыр 103 псалом

Псалтыр
Пераклад Антонія Бокуна → Пераклад Чарняўскага 2017

 
 

Псальм Давіда. Дабраславі, душа мая, ГОСПАДА, і ўсё нутро маё — імя Ягонае сьвятое!
 
Давідаў. Дабраславі, душа мая, Госпада, і ўсё, што ёсць ува мне, — імя святое Яго.

Дабраславі, душа мая, ГОСПАДА і не забывайся пра ўсё, што Ён зрабіў!
 
Дабраславі, душа мая, Госпада ды не забывай пра ўсе даброцці Яго.

Ён даруе табе ўсе беззаконьні твае, вылечвае ўсякую немач тваю,
 
Ён адпускае ўсе твае правіннасці, Ён лечыць усе кволасці твае.

вызваляе ад магілы жыцьцё тваё, літасьцю вялікай і міласэрнасьцю карануе цябе,
 
Ён адкупае душу тваю ад загубы, Ён вянчае цябе міласэрнасцю і літасцю;

насычае дабром старасьць тваю, аднаўляе, як у арла, маладосьць тваю.
 
Ён напаўняе дабротамі пры жыцці цябе, аднаўляецца, як у арла, маладосць твая.

Праведнасьць чыніць ГОСПАД і суд для ўсіх прыгнечаных.
 
Госпад, што чыніць справядлівасць і суд для ўсіх, хто церпіць крыўду,

Ён зрабіў вядомымі шляхі Свае Майсею, сынам Ізраіля — учынкі Свае.
 
Ён даў Майсею спазнаць шляхі Свае, сынам Ізраэля — справы Свае.

Спагадлівы і літасьцівы ГОСПАД, павольны да гневу і багаты на міласэрнасьць.
 
Літасцівы і спагадны Госпад, доўгацярплівы і вельмі міласэрны.

Не назаўсёды Ён гневам палае і ня вечна памятае ліхое.
 
Не бясконца Ён сварыцца ды не вечна будзе гневацца.

Не паводле грахоў нашых нам Ён дае і не ўчыняе з намі паводле беззаконьняў нашых,
 
Не адгаджае нам паводле грахоў нашых і не помсціць нам за правіннасці нашыя.

бо як высока неба над зямлёю, так вялікая міласэрнасьць Ягоная да тых, што баяцца Яго,
 
Бо, наколькі ўзвышаецца неба над зямлёю, настолькі перавышае міласэрнасць Яго страх Яго.

як далёкі ад захаду ўсход, так [далёка] Ён нашыя правіны ад нас аддаліў,
 
Як далёкі ўсход ад захаду, так аддаляе Ён ад нас грахі нашы.

як літуецца бацька над сынамі, так ГОСПАД літуецца над тымі, што баяцца Яго.
 
Як бацька літуецца над сынамі, так Госпад злітаваўся над тымі, што шануюць Яго.

Бо ведае Ён настаўленьне нашае, памятае, што мы — [толькі] пыл.
 
Бо Ён спазнаў стварэнне наша, успомніў, што мы — пыл.

Дні чалавечыя — як трава; як кветка ў полі, так ён квітнее,
 
Быццам трава дні людскія, чалавек цвіце, як краска палявая,

бо пройдзе над ім вецер, і няма яго, і ўжо месца ягонае больш не пазнае яго.
 
ледзь павее на яе вецер, і ўжо няма яе, і месца яе невядомае.

Але міласэрнасьць ГОСПАДА ад веку і на вякі над тымі, што баяцца Яго, і праведнасьць Ягоная — над сынамі сыноў
 
А міласэрнасць жа Госпадава спрадвеку па век над тымі, што шануюць Яго, а справядлівасць Яго — для сыноў сынавых.

тых, якія захоўваюць запавет Ягоны і загады Ягоныя памятаюць, каб выконваць іх.
 
Для тых, якія трымаюцца запавету Яго і памятаюць прыказанні Яго, каб спаўняць іх.

ГОСПАД умацаваў пасад Свой на нябёсах, і валадарства Ягонае над усім пануе.
 
Госпад у небе падрыхтаваў пасад Свой, і валадарыць Ён над усім светам.

Дабраславіце ГОСПАДА, анёлы Ягоныя, магутныя моцаю, што выконваеце слова Ягонае, чуючы голас слова Ягонага!
 
Дабраслаўляйце Госпада, усе анёлы Яго, моцныя магуццем, робячы па слове Яго на паслухмянасць голасу мовы Яго.

Дабраславіце ГОСПАДА, усе войскі Ягоныя, служыцелі Ягоныя, што выконваеце волю Ягоную!
 
Дабраслаўляйце Госпада, усе магуцці Яго, слугі Яго, якія выконваеце волю Яго.

Дабраславіце ГОСПАДА, усе творы Ягоныя па ўсіх месцах панаваньня Ягонага! Дабраславі, душа мая, ГОСПАДА!
 
Дабраслаўляйце Госпада, усе справы Яго, і ў кожным месцы Яго валадарання дабраславі, душа мая, Госпада!