Псалтыр 150 псалом

Псалтыр
Пераклад Антонія Бокуна → Пераклад Чарняўскага 2017

 
 

Альлелюя! Хвалеце Бога ў сьвятыні Ягонай, хвалеце Яго ў прасьцягу моцы Ягонай!
 
Алілуя! Хваліце Госпада ў свяцілішчы Яго, хваліце Яго на апоры магуцця Яго.

Хвалеце Яго за магутнасьць Ягоную; хвалеце Яго дзеля мноства велічы Ягонай!
 
Хваліце Яго ў магутнасцях Яго, хваліце Яго паводле мноства велічнасці Яго.

Хвалеце Яго гукам трубаў, хвалеце Яго на псалтыры і гусьлях!
 
Хваліце Яго гукам трубы, хваліце Яго гуслямі і цытрай,

Хвалеце Яго з бубнамі і карагодамі; хвалеце Яго на струнах і жалейках!
 
хваліце Яго бубнам і хорам, хваліце Яго на струнах і арганамі,

Хвалеце Яго на цымбалах гучных; хвалеце Яго на цымбалах галосных!
 
хваліце Яго на мілагучных цымбалах і на цымбалах грукатлівых:

Усякае дыханьне няхай хваліць ГОСПАДА! Альлелюя!
 
усё, што дыхае, хай хваліць Госпада! Алілуя!