Псалтыр 148 псалом

Псалтыр
Пераклад Антонія Бокуна → Пераклад Чарняўскага 2017

 
 

Альлелюя! Хвалеце ГОСПАДА з неба, хвалеце Яго на вышынях!
 
Алілуя. Хваліце Госпада з нябёсаў, хваліце Яго на вышынях.

Хвалеце Яго, усе анёлы Ягоныя! Хвалеце Яго, усе войскі Ягоныя!
 
Хваліце Яго, усе анёлы Яго, хваліце Яго, усе магуцці Яго.

Хвалеце Яго, сонца і месяц, хвалеце Яго, усе зоркі ясныя!
 
Хваліце Яго, сонца і месяц, хваліце Яго, усе зоркі бліскучыя.

Хвалеце Яго, нябёсы нябёсаў, і вы, воды, што па-над нябёсамі!
 
Хваліце Яго, нябёсы нябёсаў, і ўсе воды, якія над небам.

Няхай яны хваляць імя ГОСПАДА, бо Ён загадаў, і былі створаныя,
 
Хваліце імя Госпада, бо загадаў Ён, і ўсё было створана;

і паставіў іх на вякі вечныя; даў ім пастанову, і не пераступяць яе.
 
устанавіў Ён гэта навечна і на векі вечныя, паклаў загад, і не зменіць [яго].

Хвалеце ГОСПАДА з зямлі, цмокі і ўсе бяздоньні,
 
Хваліце Госпада з зямлі, марскія драконы і ўсе бяздонні,

агонь і град, сьнег і туман, вецер бурны, які дзее паводле слова Ягонага,
 
агонь, град, снег, імгла, вецер навальнічны, які спаўняе слова Яго,

горы і ўзгоркі ўсе, дрэвы пладовыя і кедры ўсе,
 
горы і ўсе ўзгоркі, дрэвы пладовыя і ўсе кедры,

зьвяры і ўся скаціна, паўзуны і птаства крылатае,
 
дзікія звяры і ўсякая жывёла, паўзуны і птушкі крылатыя.

валадары зямныя і ўсе народы, князі і ўсе судзьдзі зямлі,
 
Цары зямныя і ўсе народы, князі і ўсе суддзі зямлі,

юнакі разам з дзяўчатамі, старыя і маладыя.
 
юнакі і дзяўчаты, старыя з падлеткамі

Няхай яны хваляць імя ГОСПАДА, бо толькі Ягонае імя ўзьвялічанае, слава Ягоная над зямлёю і небам!
 
хай славяць імя Госпада, бо ўзвысілася імя аднаго Яго. Веліч Яго вышэй за неба і зямлю,

Ён узьняў рог народу Свайго. Хвала Яму ад усіх багабойных Ягоных, ад сыноў Ізраіля, ад народу, блізкага Яму! Альлелюя!
 
і ўзвысіў Ён рог народа Свайго. Песнь хвалы ўсім святым Яго, сынам Ізраэля, народа, які Яму блізкі. Алілуя.