Псалтыр 148 псалом

Псалтыр
Пераклад Яна Станкевіча → Пераклад Чарняўскага 2017

 
 

Галілуя! Хваліце СПАДАРА зь нябёсаў, хваліце Яго на вышынях.
 
Алілуя. Хваліце Госпада з нябёсаў, хваліце Яго на вышынях.

Хваліце Яго, усі ангілаве Ягоныя; хваліце Яго, усі войскі Ягоныя;
 
Хваліце Яго, усе анёлы Яго, хваліце Яго, усе магуцці Яго.

Хваліце Яго, сонца й месяц; хваліце Яго, усі ясныя гвезды;
 
Хваліце Яго, сонца і месяц, хваліце Яго, усе зоркі бліскучыя.

Хваліце Яго, нябёсы нябёс і воды, што над нябёсамі.
 
Хваліце Яго, нябёсы нябёсаў, і ўсе воды, якія над небам.

Хай хваляць імя СПАДАРОВА, бо Ён расказаў, і стварыліся яны;
 
Хваліце імя Госпада, бо загадаў Ён, і ўсё было створана;

Ён устанавіў іх на векі а векі; даў права, ад каторага яны не адступяць.
 
устанавіў Ён гэта навечна і на векі вечныя, паклаў загад, і не зменіць [яго].

Хваліце СПАДАРА ізь зямлі, морскія дзіўствы і ўсі глыбіні,
 
Хваліце Госпада з зямлі, марскія драконы і ўсе бяздонні,

Цяпло й град, сьнег і туман, буйны вецер, выпаўняючы слова Ягонае,
 
агонь, град, снег, імгла, вецер навальнічны, які спаўняе слова Яго,

Горы а ўзгоркі, пладовыя дзервы і ўсі кедры,
 
горы і ўсе ўзгоркі, дрэвы пладовыя і ўсе кедры,

Дзікія зьвяры й увесь статак, паўзуны й птушкі крылатыя,
 
дзікія звяры і ўсякая жывёла, паўзуны і птушкі крылатыя.

Каралёве земныя і ўсі люды, князі і ўсі судзьдзі земныя,
 
Цары зямныя і ўсе народы, князі і ўсе суддзі зямлі,

Дзяцюкі й таксама дзяўчаты, старыя з малцамі.
 
юнакі і дзяўчаты, старыя з падлеткамі

Хай хваляць імя СПАДАРОВА, бо ўзьнята імя Ягонае адзінае, вялічча Ягонае на зямлі й на небе.
 
хай славяць імя Госпада, бо ўзвысілася імя аднаго Яго. Веліч Яго вышэй за неба і зямлю,

Ён узвышыў рог люду Свайго, хвалу ўсіх дабрачэсьлівых Сваіх, сыноў Ізраельскіх, люду блізкога Сабе. Галілуя!
 
і ўзвысіў Ён рог народа Свайго. Песнь хвалы ўсім святым Яго, сынам Ізраэля, народа, які Яму блізкі. Алілуя.