Псалтыр 85 псалом

Псалтыр
Пераклад Яна Станкевіча → Пераклад Чарняўскага 2017

 
 

Кіраўніку хору. Сыноў Корыных. Псальма.
 
Кіраўніку хору. Сыноў Корэ. Псальм.

Ты прыяў зямлі Сваёй, СПАДАРУ, зьвярнуў палон Якаву,
 
Спагадным быў Ты, Госпадзе, у Тваёй зямлі, перавярнуў Ты паланенне Якубава.

Дараваў бяспраўі люду Свайго, закрыў усі грахі яго (Сэля),
 
Адпусціў Ты несправядлівасць народа Твайго, дараваў усе грахі іх.

Забраў назад усе абурэньне Свае, узьдзержыўся ад палаючага гневу Свайго.
 
Спыніў Ты ўвесь гнеў Твой, адступіўся ад абурэння раздражнёнасці Тваёй.

Зьвярні нас, Божа спасеньня нашага, і спыні гнеў Свой на нас.
 
Навярні нас, Божа, збаўленне наша, і адвядзі гнеў Твой ад нас.

Ці на векі будзеш гневаціся на нас? ці гнеў Свой расьцягнеш з пакаленьня ў пакаленьне?
 
Ці ж вечна будзеш гневацца на нас, ці ж прадоўжыш гнеў Твой з пакалення ў пакаленне?

Ці Ты ня зьвернешся й не ажывіш нас, каб люд Твой цешыўся ў Табе?
 
Няўжо Ты, навярнуўшы, не ажывіш нас і народ Твой не ўзвесяліцца з Табою?

Пакажы нам ласку Сваю, СПАДАРУ, і спасеньне Свае дай нам.
 
Госпадзе, пакажы нам Тваю міласэрнасць і дай нам Тваё збаўленне.

Паслухаю, што кажа Бог СПАДАР, бо Ён будзе казаць супакой люду Свайму а дабрачэсьлівым Сваім; але хай не зварачаюцца ізноў да дурноты.
 
Паслухаю, што кажа Госпад Бог, бо, напэўна, вясціць Ён мір народу Свайму, і святым Сваім, і тым, якія ўсім сэрцам навяртаюцца да Яго.

Запраўды блізка спасеньне Ягонае да тых, што баяцца Яго, каб чэсьць Яго жыла ў зямлі нашай.
 
Сапраўды блізкае збаўленне Яго для тых, што шануюць Яго, каб пасялілася слава на зямлі нашай.

Ласка а праўда сустрэліся, справядлівасьць а супакой пацалаваліся.
 
Міласэрнасць і праўда спаткаюцца паміж сабою, справядлівасць і мір пацалуюцца.

Праўда ізь зямлі вырастае, і справядлівасьць ізь неба глядзіць далоў.
 
Вернасць узнікне з зямлі, а справядлівасць прагляне з неба.

Але, СПАДАР дасьць дабро, і зямля наша выдасьць плод свой.
 
Бо Госпад дасць добразычлівасць, а зямля наша дасць плод свой.

Справядлівасьць пойдзе перад Ім і аберне ў дарогу сігні Ягоныя.
 
Справядлівасць пойдзе перад Ім, і паставіць на дарозе крокі свае.