Псалтыр 25 псалом

Псалтыр
Пераклад Яна Станкевіча → Пераклад Чарняўскага 2017

 
 

Давідава. Да Цябе, СПАДАРУ ўзьнімаю душу сваю.
 
АЛЕФ. Давідаў. Да Цябе, Госпадзе, узняў я душу маю.

Божа мой! на Цябе я спадзяюся, няхай ня буду засаромлены, няхай непрыяцелі мае не захапляюцца з радасьці зь мяне.
 
БЭТ. Божа мой, на Цябе спадзяюся; хай не сумеюся! Хай не кпяць з мяне непрыяцелі мае.

І ўсі, што спадзяюцца на Цябе, ня будуць засаромлены; будуць засаромленыя тыя, што бяз прычыны ізрадныя.
 
ГІМЭЛЬ. Бо ўсе тыя, што трымаюцца Цябе, не будуць засаромлены. Засаромлены будуць тыя, што чыняць бязвер’е дзеля марнасці.

Дарогі Свае, СПАДАРУ, азнаймі імне; сьцежкаў Сваіх наўчы мяне.
 
ДАЛЕТ. Пакажы мне, Госпадзе, Свае дарогі і навучы мяне Сваім сцежкам.

Вядзі мяне ў праўдзе Сваёй і наўчы мяне; бо Ты Бог спасеньня майго, на Цябе я спадзяюся ўвесь дзень.
 
ГЭ. Вядзі мяне праўдай Тваёй і вучы мяне, бо Ты Бог збавення майго. ВАЎ. На Цябе спадзяюся штодня.

Памятуй міласэрдзе Свае, СПАДАРУ, і ласку Сваю, бо спрадвеку яны.
 
ДЗАЙН. Помні, Госпадзе, пра міласці Твае і пра міласэрнасць Тваю, бо яны спрадвечныя!

Грахоў маладосьці мае і выступаў маіх не ўспамінай; подле міласэрдзя Свайго ўспомні мяне Ты, дзеля дабрыні Свае, СПАДАРУ!
 
ГЭТ. Не прыпамінай грахоў маладосці маёй і злачынстваў маіх, але помні пра мяне Ты паводле міласэрнасці Тваёй, згодна дабраце Тваёй, Госпадзе.

Добры а верны СПАДАР; і затым наўчае грэшнікаў у дарозе;
 
ТЭТ. Спагадны і праведны Госпад, таму наставіць грэшнікаў на шлях;

Водзе лагодных у судзе і наўчае лагодных дарогі Свае.
 
ЁД. пакорлівых накіруе па справядлівасці, наставіць сціплых на шляхі іх.

Усі дарогі СПАДАРОВЫ — ласка а праўда тым, што дзяржаць змову Ягоную а сьветчаньні Ягоныя.
 
КАФ. Усе шляхі Божыя — міласэрнасць і праўда для тых, што трымаюцца запавету Яго і сведчанняў Яго.

Дзеля імені Свайго, СПАДАРУ, даруй бяспраўе мае, бо яно вялікае.
 
ЛЯМЭД. Дзеля імя Твайго, Госпадзе, злітуешся над грахом маім: бо ён так вялікі.

Хто тый муж, што баіцца СПАДАРА? Ён наўчае ў дарозе, што яму абраць.
 
МЭМ. Хто той чалавек, які шануе Госпада? Ён наставіць такога на шлях, які [той] выбірае.

Душа ягоная ў дабру будзе перабываць, і насеньню ягонаму спадзець зямля.
 
НУН. Душа яго ў дабротах прабудзе, а семя яго ўспадкаеміць зямлю.

Тайна СПАДАРОВА тым, што баяцца Яго, і змову Сваю Ён азнаймляе ім.
 
САМЭК. Спагадае Госпад тым, што баяцца Яго, каб адкрыць ім Свой запавет.

Вочы мае штачасна да СПАДАРА, бо Ён выблытае ізь сеці ногі мае.
 
АЙН. Мае вочы заўсёды да Бога, бо Ён вырве ногі мае з пасткі.

Абярніся да мяне й зьмілуйся над імною, бо я адзінокі а гаротны.
 
ФЭ. Глянь на мяне і пашкадуй мяне, бо самотны я і няшчасны.

Гарота сэрца майго пашырылася, — з уціскаў маіх вывядзі мяне.
 
САДЭ. Пашыр цясніны сэрца майго і вырві мяне з засмучэнняў маіх.

Зваж на гора мае а стому маю і даруй усі грахі мае.
 
Прыглядзіся да пакорлівасці маёй і да цяжару працы маёй і адпусці ўсе правіны мае.

Глянь на непрыяцеляў маіх, бо іх шмат, і глабальнаю ненавіднасьцю ненавідзяць яны мяне.
 
РЭС. Глянь на ворагаў маіх, бо яны размножыліся, і лютай нянавісцю зненавідзелі мяне.

Усьцеражы душу маю, і вывальні мяне; няхай ня буду паганьбены, бо я здаюся на Цябе.
 
СІН. Пільнуй душу маю і вырві мяне; не пасаромлюся, бо я ўсклаў надзею на Цябе.

Беззаганнасьць а пасьцівасьць хай крыюць мяне, бо я на Цябе спадзяюся.
 
ТАЎ. Хай бязвіннасць і справядлівасць пільнуюць мяне, бо я трымаўся Цябе.

Выкупі, Божа, Ізраеля з усіх бедаў ягоных.
 
ФЭ. Збаў, Божа, Ізраэль ад усіх няшчасцяў яго.