Псалтыр 98 псалом

Псалтыр
Пераклад Яна Станкевіча → Пераклад Чарняўскага 2017

 
 

Псальма. Пейце СПАДАРУ новую песьню, бо чудосы ўчыніў Ён. Памагла Яму правіца Ягоная й сьвятое плячо Ягонае.
 
Псальм. Спявайце Госпаду новую песню, бо ўчыніў Ён цуды. Паратунак у правіцы Яго і ў руцэ святой Яго.

Ведамым зрабіў СПАДАР спасеньне Свае, перад ачыма народаў Ён аб’явіў справядлівасьць Сваю.
 
Госпад абвясціў Сваё збаўленне, на віду паганаў аб’явіў Ён Сваю справядлівасць.

Успомнеў Ён ласку Сваю а вернасьць Сваю да дому Ізраелявага. Абачылі ўсі канцы зямлі спасеньне Бога нашага.
 
Успомніў Ён пра міласэрнасць Сваю і пра праўду Сваю для дома Ізраэля. Убачаць усе канцы свету збаўленне Бога нашага.

Весела гукайце СПАДАРУ, уся зямля, завядзіце, пейце а грайце.
 
Услаўляй гучна Бога, уся зямля, выбягайце, радуйцеся і грайце псальмы.

Грайце СПАДАРУ на гарпе, на гарпе і голасам песьні;
 
Грайце Госпаду на цытры, на цытры і з гукамі псальма.

На трубах і з гукам рогу весела гукайце перад Каралём СПАДАРОМ.
 
На срэбных трубах і пад гукі рога спявайце гучна славу перад абліччам Госпада Валадара.

Няхай мора гудзіць і паўніня яго, сьвет і жывучыя ў ім;
 
Хай шуміць мора і ўсё, што яго запаўняе, увесь сусвет і тыя, што ў ім пражываюць.

Няхай цур’і б’юць уладкі; хай горы разам вяселяцца
 
Хай рэкі плешчуць у далоні і разам радуюцца горы

Перад відам СПАДАРОВЫМ, бо Ён прыходзе судзіць зямлю; будзе судзіць сьвет у справядлівасьці і люды ў пасьцівасьці.
 
перад Госпадам, бо прыходзіць Ён судзіць зямлю. Ён будзе судзіць сусвет па справядлівасці і народы — па праўдзе.