Псалтыр 48 псалом

Псалтыр
Пераклад Яна Станкевіча → Пераклад Чарняўскага 2017

 
 

Песьня. Псальма сыноў Корыных.
 
Песня. Псальм. Сыноў Корэ.

Вялікі СПАДАР і вельма ўслаўлены ў месьце Бога нашага, на сьвятой гары Сваёй.
 
Вялікі Госпад і праслаўлены вельмі ў горадзе нашага Бога.

Харошая на ўзвышшу, радасьць усяе зямлі гара Сыён, на паўночных старанах места вялікага Караля.
 
Святая гара Яго, прыгожы ўзгорак — радасць усёй зямлі. Гара Сіён, скрай поўначы, горад вялікага Валадара.

Бог у палацах ягоных, ведамны як горад.
 
Бог у дамах яго вядомы зрабіўся як прыстанішча.

Бо, гля, каралі зьберліся, яны прайшлі разам.
 
Бо сышліся цары, сабраліся, як адзін.

Як толькі яны абачылі, яны зумеліся, спалохаліся, уцяклі.
 
Калі ж самі ўбачылі, так здзівіліся, што стрывожыліся і ўцяклі.

Дрыгота схапіла іх там, труднасьці, як у парадзіхі.
 
Страх напаў там на іх і боль, быццам у парадзіхі.

Усходнім ветрам Ты паламіў караблі таршыскія.
 
Ветрам усходнім скрышыў Ты караблі Тарсіскія.

Як мы чулі, так Мы абачылі ў месьце СПАДАРА войскаў; у месьце Бога нашага; Бог устанавіў яго на векі. Сэля.
 
Так, як мы спачулі, так і пабачылі ў горадзе Бога Магуццяў, у горадзе нашага Бога, Бог заснаваў яго навек.

Мы думалі, Божа, праз ласку Тваю сярод сьвятыні Твае.
 
Мы разважаем, Божа, пра Тваю міласэрнасць пасярод святыні Тваёй.

Як імя Твае, Божа, так хвала Твая да канцоў зямлі; справядлівасьці поўная правіца Твая.
 
Як імя Тваё, Божа, так і хвала Твая — да ўскрайкаў зямлі. Правіца Твая поўная справядлівасці.

Няхай вяселіцца гара Сыён, няхай цешацца дачкі Юдэйскія із судоў Тваіх.
 
Хай весяліцца гара Сіён, хай радуюцца дочкі Юды з прычыны Тваіх судоў.

Аступіце Сыён, абыйдзіце навокал яго, палічыце вежы яго,
 
Абыдзіце Сіён наўкола і абдыміце яго, палічыце яго вежы.

Ськіруйце сэрца вашае на валы яго, разглядайце палацы яго, каб пераказаць пакаленьню апошняму;
 
Адчуйце сэрцам вашым магуцце яго і прабяжыцеся ўздоўж дамоў яго, каб расказаць іншаму пакаленню.

Бо гэта Бог, Бог наш на векі а векі; Ён будзе весьці аж да сьмерці.
 
Бо гэта і ёсць Бог, Бог наш навечна і на векі вечныя; Ён павядзе нас праз вякі.