Псалтыр 80 псалом

Псалтыр
Пераклад Яна Станкевіча → Пераклад Чарняўскага 2017

 
 

Кіраўніку хору. На Шошанім Едуф. Псальма Асафова.
 
Кіраўніку хору. Паводле «Лілея навучання». Асафа. Псальм.

Пастыру Ізраеляў! уважай; Ты, што водзіш, як статак, Язэпа, седзячы меж Херуваў, зьзяй.
 
Ты, што пасвіш Ізраэля, зважай! Ты, што вядзеш, бы авечку, род Язэпа; Ты, што сядзіш на херубіне,

Перад Яхрэмам а Веняміном а Манасом пабудзі магутнасьць Сваю й прыйдзі спасьці нас.
 
заззяй перад Эфраімам, Бэньямінам, Манасам. Узруш сілу Тваю і прыйдзі, каб збавіць нас.

Божа, зьвярні нас; хай зьзяе від Твой, і будзем спасёны!
 
Божа, навярні нас, прасвятлі аблічча Тваё, і мы будзем збаўлены.

СПАДАРУ, Божа войскаў! пакуль будзе курэць гнеў Твой на малітву люду Свайго?
 
Госпадзе Божа магуццяў, як доўга будзеш гневацца на малітву народа Твайго?

Ты жывіў іх хлебам сьлёзным і даваў ім сьлёзы піць утрая больш.
 
Накарміў Ты нас хлебам слёз і напаіў нас багата слязамі.

Ты пастанавіў нас на зваду суседзям нашым, і непрыяцелі нашы сьмяюцца мяжсобку.
 
Зрабіў Ты нас прадметам спрэчак суседзяў нашых, і ворагі нашыя кпілі з нас.

Божа войскаў! зьвярні нас; хай зьзяе від Твой, і будзем спасёны;
 
Божа магуццяў, навярні нас, прасвятлі аблічча Тваё, і мы будзем збаўлены.

Ты перанёс віно зь Ягіпту, выгнаў народы й пасадзіў яго;
 
Перанёс Ты вінаград з Егіпта, выгнаў паганаў, а яго пасадзіў.

Ты ачысьціў месца перад ім і зрабіў, каб глыбака ўкаранілася і напоўніла зямлю.
 
Ты ачысціў для яго месца, укараніў яго і ён напоўніў зямлю.

Горы пакрыліся яго сьценям, і гольле яго, як кедры Божыя;
 
Пакрыліся горы ценем яго, а галінамі яго — кедры Божыя.

Яно пусьціла гольле аж да мора і аж да Ракі пагоны свае.
 
Працягнуў ён парасткі свае аж да мора, і аж да ракі — атожылкі свае.

Нашто зламіў Ты агарожу яго, так што ўсі праходзячыя ўздоўж дарогі ірвуць плады яго?
 
Чаму ж разбурыў Ты агароджу яго, і абіраюць яго ўсе, што міма ідуць дарогай?

Лесавы дзік пустоша яго, ідзікая жывёла ў полю жывіцца ім.
 
Падкапаў яго дзік з лесу, і адзінокі звер пааб’ядаў яго.

Божа войскаў! зьвярні ж, глянь ізь нябёс і бач, даведайся да гэтага віна,
 
Божа магуццяў, навярніся, глянь з неба і пабач, і наведай гэты вінаграднік.

І ахарані тое, што пасадзіла правіца Твая, і пагон, што Ты ўмацаваў Сабе.
 
І заапякуйся тым, што насадзіла Твая правіца, і над сынам чалавечым, якога Ты ўмацаваў для Сябе.

Спалена яно цяплом, сьцята яно; няхай яны загінуць ад вайцяньня віду Твайго!
 
Яго спалілі агнём і перакапалі; ад вымовы Тваёй яны загінуць.

Але няхай рука Твая будзе над мужам правіцы Твае, на сыну людзкім, каторага Ты ўмацаваў Сабе.
 
Хай будзе рука Твая над чалавекам правіцы Тваёй, над сынам чалавечым, якога Ты ўмацаваў для Сябе.

Тады мы ніколі не адступім ад Цябе; ажывіш нас, і імя Твае будзем гукаць.
 
Ужо больш не адступімся ад Цябе, Ты ажывіш нас, і імю Твайму будзем усклікаць.

Зьвярні нас, СПАДАРУ, Божа войскаў! Зьнярні нас, хай зьзяе від Твой, і будзем спасёны.
 
Госпадзе, Божа магуццяў, навярні нас і акажы нам спагаднасць, і будзем збаўлены.