Псалтыр 147 псалом

Псалтыр
Пераклад Яна Станкевіча → Пераклад Чарняўскага 2017

 
 

Хваліце ЯГ, бо добра пяяць Богу нашаму, бо прыемна; хвала харошая.
 
Алілуя. Хваліце Госпада, бо Ён добры, спявайце псальмы Богу нашаму, бо Ён мілы, Яму належыць хвала.

СПАДАР будуе Ерузалім, выгнаньнікаў Ізраеля зьбірае.
 
Госпад будуе Ерузалім, збірае расцярушаных з Ізраэля.

Ён леча зломленых сэрцам і завязуе раны іхныя;
 
Ён лечыць зламаных духам і перавязвае іх раны;

Прызначае лік гвездаў і завець іх усіх імёнамі.
 
Ён вызначае лік зорак і ўсім ім дае імёны.

Вялікі Спадар наш і вялікае сілы, розум Ягоны няшчысьлёны.
 
Вялікі Госпад наш і вялікі магуццем, няма ліку мудрасці Яго.

СПАДАР падпірае пакорных, паніжае нягодных аж да зямлі.
 
Госпад падтрымлівае пакорлівых, а грэшнікаў прыніжае аж да зямлі.

Адказуйце СПАДАРУ з падзякаю, пяіце на гарпе Богу нашаму,
 
Спявайце Госпаду песню падзякі, грайце псальмы Госпаду нашаму на цытры.

Каторы пакрывае неба булакамі, Каторы гатуе дождж зямлі, Каторы прычыняе, што на горах трава расьцець,
 
Ён закрывае неба хмарамі і ўдабрае зямлю дажджом, Ён вырошчвае траву на гарах і траву, карысную людзям.

Даець статку корм яго, і ґруґанятам, каторыя крычаць.
 
Ён дае ежу жывёле Сваёй і вараняткам, якія прызываюць Яго.

Ня сілы каня Ён зыча, не ў галёнках людзіны мае прыемнасьць.
 
Не захапляе Яго сіла каня, ані сіла ног чалавечых.

СПАДАР прыяе тым, што баяцца Яго, тым, што спадзяюцца на міласэрдзе Ягонае.
 
Падабаюцца Госпаду тыя, што Яго шануюць, і тыя, што ўсклалі надзею на міласэрнасць Яго.

Слаў, Ерузаліме, СПАДАРА; хвалі Бога свайго, Сыёне;
 
Хвалі, Ерузалім, Госпада, выслаўляй Бога твайго, Сіён.

Бо Ён умацніў завалы брамаў тваіх, Ён дабраславіў сыноў тваіх у табе;
 
Бо Ён умацаваў засаўкі брамаў тваіх, дабраславіў сыноў тваіх у табе.

Робе граніцы твае мірнымі, тукам пшонкі сыце цябе;
 
Ён усталёўвае супакой як межы твае і да сытасці корміць цябе пшаніцаю.

Пасылае расказаньне Свае на зямлю; вельмі борзда бяжыць слова Ягонае;
 
Пускае прырачэнне Сваё на зямлю, хутка ляціць Яго слова.

Даець сьнег, як воўну; сыпе шэрась, як попел;
 
Ён дае снег, быццам воўну, іней, быццам попел, рассыпае.

Пушчае лёд свой драбамі; перад сьцюжаю Ягонаю хто вытрывае?
 
Кідае градам Сваім, як крошкамі [хлеба]; хто ўтрывае перад сцюжаю Яго?

Пасылае слова Свае й распушчае іх; падзьмець ветрам сваім, і пацякуць воды.
 
Пашле Ён слова Сваё, і растопіць іх; павее вецер Яго, і пацякуць воды.

Паведамляе словы Свае Якаву, уставы Свае а суды Свае Ізраелю.
 
Ён абвяшчае слова сваё Якубу, справядлівасці і загады Свае — Ізраэлю.

Ніякаму народу Ён так ня ўчыніў, і што да судоў, яны ня знаюць іх. Галілуя!
 
Ніводнаму народу не зрабіў так, і не аб’явіў ім сваіх прысудаў. Алілуя.