Псалтыр 81 псалом

Псалтыр
Пераклад Яна Станкевіча → Пераклад Чарняўскага 2017

 
 

Кіраўніку хору. На Ґіфскай музыцкай снадзі. Асафова.
 
Кіраўніку хору. Паводле «Выціскальняў». Асафа.

Пейце Богу, сіле нашай; гукайце Богу Якава;
 
Радуйцеся Богу, Успаможцу нашаму, гучна ўслаўляйце Бога Якубава.

Завядзі песьню, і дайце бубён, гарпу прыемную разам ізь ліраю;
 
Вазьміце псалтыр і дайце бубен, мілагучныя гуслі з цытрай.

Трубіце ў рог на маладзіку, у поўню, у сьвята наша;
 
Трубіце ў трубы на маладзік, у поўню, у дзень свята нашага.

Бо ўстава Ізраеля гэта, права Бога Якававага.
 
Бо ёсць пастанова ў Ізраэлі, прыказанне ў Бога Якубава.

На сьветчаньне ў Язэпу Ён пастанавіў гэта, як ступіў на зямлю Ягіпецкую. Мову, каторае ня знаў, я чуў:
 
Ён пастанавіў гэта, як сведчанне для Язэпа, калі ён выходзіў з зямлі Егіпецкай; мову, якой не ведаў, пачуў ён:

«Я адхінуў ад цяжару плячо ягонае, рукі ягоныя вывальніў ад каша.
 
Я вызваліў ад цяжару спіну яго, рукі яго пазбыліся каша.

У ўціску ты гукаў, і Я выбавіў цябе; Я адказаў табе ў тайным месцу грому, прабаваў цябе на водах Мерывы. Сэля.
 
Прызываў ты Мяне ў бядзе, і Я выратаваў цябе, пачуў цябе ў сховах навальніцы, выпрабаваў цябе пры вадзе Мэрыбы.

Слухай, людзе Мой, і Я буду сьветчыць табе; О Ізраелю, калі б ты паслухаў Мяне!
 
Слухай, Мой народзе, буду клікаць цябе ў сведкі: «Ізраэль, каб толькі ты паслухаў Мяне!»

Хай ня будзе ў цябе чужога бога, і ня кланяйся богу чужаземнаму.
 
Не будзе ў цябе бога чужога, і не будзеш ты пакланяцца богу іншаземнаму:

Я — СПАДАР, Бог твой, Каторы ўзьвёў цябе ізь зямлі Ягіпецкае; шырака рашчыні рот свой, і Я напоўню яго.
 
Але Я — Госпад, Бог твой, Які вывеў цябе з зямлі Егіпецкай! Адкрый вусны свае, і Я напоўню іх.

І ня слухаў люд Мой голасу Майго, Ізраель не хацеў Мяне;
 
Але не паслухаў Мой народ голасу Майго, і Ізраэль не звярнуўся да Мяне.

І Я пусьціў іх на ўпорлівасьць сэрцаў іхных, хай ідуць подле радаў сваіх.
 
Таму пакінуў Я іх паводле закамянеласці сэрца іх, будуць хадзіць яны ў сваіх намерах.

О каб люд Мой паслухаў Мяне, каб Ізраель хадзіў па дарогах Маіх!
 
О, каб народ Мой Мяне паслухаў, каб Ізраэль хадзіў па Маіх дарогах!

Яшчэ крыху, і Я ўборзьдзе непрыяцеляў іхных услышыў бы, і на ўцісканьнікаў іхных павярнуў бы руку Сваю;
 
Неўзабаве Я ўпакорыў бы непрыяцеляў яго і накіраваў бы руку Маю супраць прыгнятальнікаў яго.

Ненавідзячыя СПАДАРА зьгіналіся б перад імі, і трываў бы на векі іх час;
 
Непрыяцелі Госпадавы ліслівілі б перад ім, і доля іх была б навечна.

Я жывіў бы вас тукам пшонкі і мёдам із скалы насыціў бы вас».
 
І карміў бы Я іх адборнай пшаніцай і насычаў бы іх мёдам са скалы.