Псалтыр 95 псалом

Псалтыр
Пераклад Яна Станкевіча → Пераклад Чарняўскага 2017

 
 

Прыйдзіце, пейма СПАДАРУ, весела гукайма Скале спасеньня нашага.
 
Прыходзьце, узрадуемся Госпаду; уславім гучна Бога збаўлення нашага.

Перайміма від Ягоны з падзякаю, псальмамі вельма гукайма Яму;
 
Успрымем загадзя аблічча Яго, у вызнанні і ў псальмах гучна ўславім Яго.

Бо Бог — СПАДАР вялікі й вялікі Кароль над усімі багамі,
 
Бо вялікі Госпад і вялікі валадар над усімі багамі.

У каторага ў руццэ глыбіні зямлі, вышыні гор Ягоныя таксама,
 
Бо ў руцэ Яго глыбіні зямныя і вышыні горныя — у Яго.

У каторага мора, і Ён учыніў яго, і сушу рукі Ягоныя ўхармавалі.
 
Бо ў Яго — мора, і Ён стварыў яго, і сушу яго рукі сфармавалі.

Прыйдзіце, пакланімася а прыклякніма, уклякніма перад СПАДАРОМ, Каторы ўчыніў нас!
 
Прыходзьце, паклонімся, і ўкленчым, схілім калені перад Госпадам, Які стварыў нас,

Бо Ён Бог наш, а мы людзі ягонае пасты і авечкі рукі Ягонае. Сядні, калі голас Ягоны пачуеце,
 
бо Ён ёсць Бог наш, мы ж народ пашы Яго і авечкі рукі Яго. О, каб вам сёння

Не каляньце сэрца свайго, як у Мерывы, у часе пробы на пустыні,
 
паслухаць голас Яго: не закамяняйце сэрцаў вашых,

«Як спакушалі Мяне бацькі вашыя, прабавалі Мяне, дарма што бачылі справу маю.
 
як у Мэрыбе, як у дзень спакушэння ў Масе ў пустыні, дзе спакушалі Мяне бацькі вашы: выпрабоўвалі Мяне, хоць і бачылі справы Мае.

Сорак год Я брыдзіўся родам і сказаў: "Люд, што блудзе сэрцам, ды яны не пазналі дарогаў Маіх";
 
Сорак гадоў надакучала Мне гэтае пакаленне, і сказаў Я: «Яны — народ аблудных сэрцам. І яны не пазналі шляхоў Маіх;

Затым Я прысягаў у вабурэньню Сваім, што яны ня ўвыйдуць у супакой Мой».
 
дык пакляўся Я ў гневе Маім; не ўвойдуць яны ў супачынак Мой».