Псалтыр 33 псалом

Псалтыр
Пераклад Яна Станкевіча → Пераклад Чарняўскага 2017

 
 

Гукайце з радасьці, справядлівыя, у СПАДАРУ! пасьцівым выпадае хваліць.
 
Весяліцеся, справядлівыя, у Госпадзе; справядлівым належыцца пахвала.

Хваліце СПАДАРА на гарпе, на ліры дзесяціструннай грайце яму.
 
Вызнавайце Госпада на гуслях, грайце Яму на псалтыры дзесяціструннай.

Пейце Яму новую песьню; умела грайце, з гуканьням;
 
Спявайце Яму новую песню, стройна Яму грайце з ускліканнямі.

Бо слова СПАДАРОВА справядлівае, і ўсі справы Ягоныя ў вернасьці.
 
Бо праўдзівае слова Божае, і ўсе справы Яго верныя.

Ён любе справядлівасьць а суд; ласкі СПАДАРОВАЕ поўная зямля.
 
Ён любіць справядлівасць і закон, зямля поўная міласэрнасці Госпада.

Словам СПАДАРОВЫМ нябёсы былі ўчынены, і духам вуснаў Ягоных — усі іх войскі.
 
Словам Госпадавым створаны нябёсы і дыханнем вуснаў Яго кожная сіла іх.

Як у гурбу, Ён зьбірае воды мора, у склады кладзець глыбіні.
 
Быццам у мяшок, збірае Ён воды марскія, у скарбніцах складае бяздонні.

Бойцеся СПАДАРА, уся зямля, будуць баяцца яго ўсі жыхары сьвету;
 
Хай уся зямля баіцца Бога, перад абліччам Яго хай трымцяць усе жыхары свету.

Бо Ён казаў, і сталася; Ён расказаў, і ўстанавілася.
 
Бо Ён сказаў, і сталася; Ён загадаў і стварылася.

СПАДАР разбурае рады народаў, нішча думкі людаў.
 
Госпад разбурае намеры паганаў, пустымі робіць задумы людзей.

Рада СПАДАРОВА на векі трывае, думкі сэрца Ягонага з роду ў род.
 
Намер Госпада трывае павечна, задумы Яго сэрца з роду ў род.

Шчасьлівы народ, каторага СПАДАР ё Бог, люд, каторы Ён абраў за свой спадак!
 
Шчасны той народ, для якога Госпад — гэта Бог, і той народ, які Ён выбраў Сабе ў спадчыну.

Зь нябёс глядзіць СПАДАР, бача ўсіх сыноў людзкіх;
 
Госпад глядзіць з неба, бачыць усіх сыноў чалавечых.

З пасаду, ідзе сядзіць, Ён аглядае ўсіх жыхараў зямлі.
 
Зірнуў Ён з месца Свайго пражывання на ўсіх тых, што насяляюць зямлю.

Ён, Каторы хармуе сэрцы іх усіх і разумее ўсі ўчынкі іхныя.
 
Ён, Які ўтварыў кожнаму паасобку сэрцы іх, Які разумее ўсе справы іх.

Кароль не ратуецца вялікім войскам, і дужасіл ня вывальніцца вялікаю сілаю.
 
Не бывае вызвалены цар вялікай сілай і не вызваліцца волат дзякуючы вялікай сіле сваёй.

Абмыльны конь на спасеньне, і вялікаю сілаю сваёю ён ня дасьць змогі ўцячы.
 
Ненадзейны конь для выратавання, і вялізнай сілай сваёй не ўратуе.

Вось, вока СПАДАРОВА на тых, што баяцца Яго, на тых, што спадзяюцца на ласку Ягоную,
 
Вось вочы Госпада над тымі, што Яго баяцца, і да тых, якія спадзяюцца на Яго ласку.

Каб ратаваць ад сьмерці душы іхныя і жывіць іх у галадоў.
 
Каб вырваў Ён у смерці душы іх і каб карміў іх у час голаду.

Душа наша чакае СПАДАРА: помач наша а шчыт наш Ён;
 
Душа наша мае надзею на Госпада. Ён — наш памочнік і абарона,

Бо ў Ім вяселіцца сэрца нашае, бо на імя Ягонае сьвятое мы спадзяемся.
 
бо ў Ім узрадуецца наша сэрца, і ў імю Яго мы знайшлі надзею.

Хай ласка Твая СПАДАРУ, будзе над намі, як мы спадзяемся на Цябе.
 
Дык няхай жыве міласэрнасць Твая, Госпадзе, да нас, як і мы ўскладаем надзею на Цябе.