Псалтыр 44 псалом

Псалтыр
Пераклад Яна Станкевіча → Пераклад Чарняўскага 2017

 
 

Кіраўніку хору. Сыноў Корыных навука.
 
Кіраўніку хору. Сыноў Корэ. Маскіль.

Божа, мы чулі вушамі сваімі, айцове нашы маўлялі нам, што за ўчынкі Ты зьдзеяў за дзён іхных, за дзён старавечных;
 
Божа, на свае вушы мы пачулі; нашы бацькі нам расказалі пра справу, якую ўчыніў Ты ў дні іх, у дні даўнейшыя.

Ты рукою Сваёю выгнаў народы, але іх Ты насадзіў; патрышчыў люды і адаслаў іх;
 
Ты рукой Тваёю прагнаў паганаў і насадзіў іх, вынішчыў народы і памножыў іх.

Бо не мячом іхным спала ім зямля, ані плячо іхнае ўратавала іх, але правіца Твая а плячо Твае а сьвятліня віду Твайго; бо Ты прыяў ім.
 
Бо яны не сваім мячом завалодалі зямлёю і не іх плячо збавіла іх, а Твая правіца, і плячо Тваё, і святло аблічча Твайго, бо Ты іх узлюбіў.

Ты тый, Каторы кароль мой, Божа! раскажы спасеньне Якаву.
 
Ты — Валадар мой і Бог мой, Які даруеш збаўленне Якубу.

Табою мы збадзем варагоў сваіх, зь імям Тваім патопчам паўстаючых на нас;
 
З Табою мы праганялі непрыяцеляў нашых і ў імя Тваё стапталі паўстаючых супраць нас.

Бо не на лук свой я спадзяюся, і меч мой не ўратуе мяне;
 
Бо не ў сваім луку я ўпэўнены быў, і не меч мой збаўляў мяне.

Але Ты вывальніў нас ад варагоў нашых і ненавідзячых нас Ты засароміў.
 
Але Ты збавіў нас ад нападнікаў нашых і тых, што ненавідзелі нас, Ты пасарамаціў.

Богам мы хвалімся цэлы дзень, і імені Твайму на векі будзем дзякаваць. Сэля.
 
Цэлы дзень мы будзем пахваляцца Богам і будзем вызнаваць імя Тваё вечна.

Ты, адылі, пакінуў, засарамаціў нас, і ня выходзіш у войсках нашых;
 
Цяпер жа адпіхнуў Ты нас і пасарамаціў нас і не будзеш выступаць, Божа, побач з дабрадзейнасцямі нашымі.

Ты павярнуў нас назад ад непрыяцеля, і ненавідзячыя глабаюць нас сабе;
 
Павярнуў Ты нас на ўцёкі перад непрыяцелямі нашымі; і тыя, што ўзненавідзелі нас, разрабавалі для сябе.

Ты аддаў нас, як авечкі, на емя, і меж народаў рассыпаў нас;
 
На ўбой выдаў Ты нас, быццам авечак, ды між народаў расцерушыў Ты нас.

Прадаў люд Свой задарма, не павялічыў цаны іх;
 
Народ Свой прадаў Ты за марную плату і не шмат здабыў Ты, прадаўшы яго.

Ты зрабіў нас зьдзекам у суседзяў нашых, пасьмехам а грэбаваньням тых, што навокал нас;
 
Ты выставіў нас на ганьбу нашым суседзям, на пагарджанне і на пасмешышча тым, што жывуць навокал нас.

Зрабіў нас прыказяй у народаў, ківам у людаў.
 
Ты выставіў нас, як прыказку між паганамі, на пагардлівае ківанне галавою між народамі.

Цэлы дзень ганьба мая перад імною, і сорам віду майго пакрывае мяне,
 
Няслава мая цэлы дзень перада мною, і сорам твару майго агарнуў мяне

Ад голасу лаючага а вернучага, ад паглядаў непрыяцеля а помсьніка.
 
ад голасу таго, хто ўпікае мне і ўзводзіць паклёп на мяне, ад аблічча непрыяцеля і ката.

Усе гэта прышло на нас; а мы не забыліся Цябе ані схвальшавалі змовы Твае;
 
Усё гэта найшло на нас, мы, аднак, не забыліся пра Цябе і не ўчынілі несправядлівасці ў адносінах да запавету Твайго.

Сэрца нашае не адступіла назад, не адхінуліся й сігі нашыя ад сьцежкі Твае,
 
Усё ж не адступілася назад сэрца наша і ногі нашыя не збочылі са сцежкі Тваёй;

Як Ты паражаў нас на месцу шакалоў і пакрыў нас сьмяротным сьценям;
 
але Ты ўпакорыў нас у месцы лісіным і прыкрыў нас ценем смерці.

Калі б мы забыліся імя Бога нашага альбо выцягнулі рукі нашы да чужога бога,
 
Калі б мы забыліся імя Бога нашага і калі б працягнулі рукі да боства чужога,

Ці не прасачыў бы Бог гэтага? бо Ён ведае тайны сэрца.
 
ці ж бы Бог не спытаў бы з нас за гэта? Ён жа пазведаў таямніцы сэрца.

За Цябе забіваюць нас кажны дзень, уважаюць нас за авечкі на зарэз.
 
Бо дзеля Цябе забіваюць нас увесь дзень, лічаць нас авечкамі на зарэз.

Прачхніся, чаму сьпіш, Спадару? Устань, не пакінь нас назаўсёды.
 
Прабудзіся, чаму дрэмлеш, Госпадзе? Прачніся і не пакідай [нас] да канца!

Нашто хаваеш Ты від Свой? нашто забываешся гароту нашу а ўціск наш?
 
Чаму адварочваеш аблічча Сваё, забываешся пра гора наша і бяду нашую?

Бо душа наша ўгнулася да пылу, прыліп да зямлі жывот наш.
 
Бо ўпакорана ў попеле душа наша, цесна звязана з зямлёю чэрава наша.

Устань, памажы нам, выкупі нас дзеля ласкі Свае.
 
Паўстань, Госпадзе, падтрымай нас і адкупі нас дзеля міласэрнасці Тваёй.