Псалтыр 23 псалом

Псалтыр
Пераклад Яна Станкевіча → Пераклад Чарняўскага 2017

 
 

Псальма Давідава. СПАДАР — Пастыр мой, я ня буду мець нястачы.
 
Псальм Давідаў. Госпад — Пастыр мой, і нічога мне не бракуе.

На пасьцьбішчах зялёных пасьвіць мяне, ля водаў супакойных водзе мяне;
 
На пашах зялёных Ён мяне ўладкаваў, па-над воды супачыну прывёў Ён мяне.

Душу маю аднаўляе, вядзець мяне па сьцежках справядлівасьці дзеля імені Свайго.
 
Падмацаваў душу маю, вывеў мяне на шлях справядлівасці дзеля імя Свайго.

Хоць пайду даліною сьмяротнага сьценю, не зьлякаюся ліха, бо Ты з імною; дубец Твой а посах Твой цешаць мяне.
 
Бо калі буду ісці і лагчынаю ценю смерці, не збаюся ліха, бо Ты са мною. Жазло Тваё і кій Твой — толькі яны мяне суцяшаюць.

Ты гатуеш перад імною стол насупроці праціўнікаў маіх; намасьціў алеям галаву маю, мая чара паўнюсенькая.
 
Ты накрыў перада мною стол насуперак тым, што ўціскаюць мяне; намасціў алейкам галаву маю, і келіх мой поўны з вярхом.

Адно дабрыня а міласэрдзе будуць гнацца за імною ўсі дні жыцьця майго, і я буду жыць у доме СПАДАРОВЫМ даўгія дні.
 
Спагаднасць і міласэрнасць будуць крочыць за мною следам, і пасялюся я ў доме Госпада на доўгія дні.