Псалтыр 23 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Псальм Давідавы. (На першы дзень у тыдні.)Госпад ёсьць Пастыр мой, ні ў чым мець ня буду нястачы!
 
Псальм Давідаў. Госпад — Пастыр мой, і нічога мне не бракуе.

На пасьвішчах зялёных Ён пасьвіць мяне й да водаў сьвежых водзіць мяне.
 
На пашах зялёных Ён мяне ўладкаваў, па-над воды супачыну прывёў Ён мяне.

ён узмацняе душу маю, на сьцежкі праўды вядзе мяне дзеля іменьня Свайго.
 
Падмацаваў душу маю, вывеў мяне на шлях справядлівасці дзеля імя Свайго.

Дык навет праходзячы далінаю ценю сьмяротнага ня буду баяцца напасьці, бо Ты-ж са мною: Твая паліца й падпора Твая — яны мяне пацяшаюць.
 
Бо калі буду ісці і лагчынаю ценю смерці, не збаюся ліха, бо Ты са мною. Жазло Тваё і кій Твой — толькі яны мяне суцяшаюць.

Ты прада мной застаўляеш стол перад абліччам уціскаючых мяне; галаву маю Ты памазаў алівай і чару маю даверху наліў.
 
Ты накрыў перада мною стол насуперак тым, што ўціскаюць мяне; намасціў алейкам галаву маю, і келіх мой поўны з вярхом.

Шчасьце й ласка Твая будуць са мною ўсе дні жыцьця майго; і ў доме Гасподнім астануся навекі.
 
Спагаднасць і міласэрнасць будуць крочыць за мною следам, і пасялюся я ў доме Госпада на доўгія дні.