Псалтыр 116 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Цешуся я, бо Госпад пачуў галосну малітву маю.
 
Алілуя. Палюбіў я, бо выслухаў Госпад голас малення майго.

Схіліў да мяне Ён вуха Сваё, дык клікаці буду Яго ў-ва ўсе мае дні.
 
Бо нахіліў вуха Сваё да мяне, калі прызываў я ў дні мае.

Путы сьмерці мяне абхапілі; мукі пякельныя дагналі мяне; наткнуўся я на тугу ды сум.
 
Ахуталі мяне путы смерці і пакуты пякельныя нахлынулі на мяне. Натрапіў я на бяду і пакуту.

Але клікнуў я імя Гасподняе: Збаў, Госпадзе, душу маю!
 
І стаў я прызываць імя Госпада: «О Божа, вызвалі душу маю».

Ласкавы Госпад і справядлівы, міласэрны наш Бог.
 
Міласэрны Бог і справядлівы, і Бог наш літасцівы.

Прастадушных ахоўвае Госпад; калі зьнемагаю, Ён ратуе мяне.
 
Сцеражэ Госпад малых; быў я прыніжаны, а Ён даў мне збаўленне.

Вярніся, душа мая, да супакою твайго, бо Госпад табе робіць добрае.
 
Вярніся, душа мая, да спачынку твайго, бо Госпад дабро ўчыніў табе;

Бо ад сьмерці Ты вызваліў душу маю, ад сьлёзаў — вока маё і нагу маю ад упадку.
 
бо вырваў Ён душу маю ад смерці, вочы мае — ад слёз, ногі мае — ад падзення.

Буду хадзіць прад абліччам Гасподнім у краіне жывых.
 
Буду хадзіць перад Госпадам у краіне жывых.

Я веру, дык гавару; але я крэпка прыбіты.
 
Паверыў я, і таму прамовіў: «Прыніжаны я вельмі».

У неразважлівасьці маёй я сказаў: усе людзі ілгуць!
 
Я ў страху сваім сказаў: «Кожны чалавек ашуканец».

Як аддзячыць мне Госпаду за ўсе дабрадзействы Яго для мяне?
 
Чым жа я аддам Госпаду за ўсё, што Ён аддаў мне?

Чару збаўленьня ўзьніму і імя Гасподняе клікну.
 
Вазьму келіх збаўлення і прызаву імя Госпада.

Абяцаньні мае аддам я Госпаду прад усенькім народам Ягоным.
 
Аддам абяцанні мае Госпаду перад усім народам Яго.

Прад вачыма Гасподнімі сьмерць сьвятых Яго дорага.
 
Дарагая ў вачах Госпада смерць Яго святых.

О Госпадзе! Я-ж раб Твой, сын рабыні Тваёй! Ты разьвязаў мае путы.
 
Госпадзе, я слуга Твой, і сын служанкі Тваёй. Ты разарваў путы мае.

Табе прынясу ахвяру хвалы й буду клікаць імя Гасподняе.
 
Злажу я Табе пахвальную ахвяру і прызаву імя Госпада.

Абяцаньні мае аддам я Госпаду прад усенькім народам Ягоным,
 
Аддам абяцанні мае Госпаду перад усім народам Яго

у панадворках дому Гасподняга, пасярод цябе, Ерузаліме! Альлілуя!
 
на панадворку дому Госпада, пасярод цябе, Ерузалім.