Псалтыр 71 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Пры Табе, о Госпадзе, шукаю прыпынку. Ня дай мне навек асароміцца!
 
У Табе, Госпадзе, маю надзею: не пасаромлюся навек.

Збаў нас, вызваль мяне паводле Тваёй справядлівасьці! Прыхілі да мяне Тваё вуха і дай мне ўспамогу!
 
У Сваёй справядлівасці вызваляй мяне і ратуй мяне, нахілі да мяне сваё вуха і збаў мяне.

Будзь мне скалой, што бароніць мяне, цьвярдыняю моцнай, каб мне памагчы; бо Ты і скала і цьвярдыня мая.
 
Будзь для мяне скалой абароны і ўмацаваным домам, каб збавіў Ты мяне, бо Ты цвярдыня мая і прыстанішча маё.

З моцы бязбожнага вызваль мяне, Божа мой, з рукі беззаконнага і прыгнятацеля.
 
Божа мой, вырві мяне з рукі грэшніка і з рукі беззаконнага і несправядлівага.

Бо Ты, о Госпадзе, надзея мая, спадзяваньне маё змалку год!
 
Бо Ты — чаканне маё, Госпадзе; Госпадзе, надзея мая ад юнацтва майго.

На Цябе я здаваўся ад матчына чэрава; з улоньня маткі Ты вывеў мяне; дык навекі Табе хвала ад мяне!
 
На Табе я ўгрунтаваўся ад нараджэння, з улоння маці маёй Ты апякун мой, для Цябе хвала мая заўсёды.

Шмат хто глядзіць на мяне, як на дзіва; але Ты мне заслона магутная.
 
Мо дзіўным паказаўся я для многіх, а Ты — магутны Успаможца.

Вусны мае поўны славы Тваёй, што-дня яны славяць веліч Тваю.
 
Хай напоўняцца вусны мае хвалою Тваёй, цэлы дзень — веліччу Тваёй.

Не адцурайся мяне ў маёй старасьці; калі счэзнуць сілы мае, Ты не пакінь мяне!
 
Не адпіхай мяне ў часіну старасці; калі саслабее магуцце маё, не пакідай мяне.

Бо змаўляюцца ворагі мае на мяне, і тыя, што сочаць за душою маёй, раяцца міжы сабою,
 
Бо намаўлялі непрыяцелі мае на мяне і тыя, што падпільноўвалі душу маю, учынілі змову,

кажучы: Бог пакінуў яго; дык ганіцеся за ім і схапіце яго, бо няма ў яго абаронцы!
 
кажучы: «Бог пакінуў яго! Даганіце і схапіце яго, бо няма Таго, Хто ўратуе».

Божа, ня будзь далёка ад мяне! Пасьпяшы, мой Божа, на помач да мяне!
 
Божа, не аддаляйся ад мяне, Божа мой, паспяшы мне на дапамогу.

Каб былі асаромлены й зьнішчаны тыя, што ненавідзяць душу маю! Каб ганьбай і сорамам тыя пакрыліся, што жадаюць нядолі маёй!
 
Хай пасаромяцца і знікнуць тыя, што варожа ставяцца да душы маёй; хай пакрыюцца сорамам і ганьбаю тыя, што шукаюць для мяне ліха.

Я-ж заўсёды буду чакаць і множыць славу Тваю.
 
А я вось буду заўсёды спадзявацца і памнажаць буду кожную хвалу Тваю.

Справядлівасьць Тваю будуць вусны мае абвяшчаць, пра збаўленьне ўсьцяж гаварыць, бо ім лічбы ня ведаю я!
 
Вусны мае абвясцяць справядлівасць Тваю, цэлы дзень — збаўленне Тваё, бо не ведаю ёй межаў.

Выступаць буду сілай вялікаю Госпада, буду славіць Тваю справядлівасьць, толькі Тваю!
 
Прыйду я да сіл Госпада; буду ўспамінаць я толькі пра Тваю справядлівасць.

Змалку дзён Ты вучыў мяне, Божа, і дагэтуль я цуды Твае абвяшчаю.
 
Божа, Ты вучыў мяне ад юнацтва майго, а я аж дасюль абвяшчаю цуды Твае.

І да старасьці, і да сівізны не пакідай мяне, Божа, пакуль я пра сілу Тваю не накажу пакаленьню вось гэтаму ды пра моц Тваю — ўсім, што народзяцца йшчэ.
 
І да самай старасці і нямогласці, Божа, не пакідай мяне, аж пакуль абвяшчаць буду пра магутную руку Тваю кожнаму пакаленню, якое прыйдзе ў будучым. Сіла Твая

Бо справядлівасьць Твая, о Божа, ажно да неба высокая; вялізнае, Божа, Ты учыніў, каму-ж зраўняцца з Табою?
 
і справядлівасць Твая, Божа, аж да вышыняў, учыніў Ты вялікія справы: Божа, хто ж падобны да Цябе?

Ты нам даў перажыць многа бед і нягод, але Ты ажывіш нас нанова і з бяздоньняў зямлі зноў выцягнеш нас.
 
Ты паказаў мне шматлікія і ліхія беды; ды зноў ажывіў Ты мяне і з бездані зямной ізноў вывеў.

Ты памножыш сілу маю і пацешыш мяне;
 
Ты памнож велічнасць маю і, вярнуўшыся, суцеш мяне.

дык і я на псалтыры, мой Божа, буду хваліці Цябе і праўду Тваю! Буду на гусьлях іграці Табе, о Сьвяты Ізраіля!
 
Я таксама буду вызнаваць Цябе, у псалтыры — праўду Тваю, Божа мой, спяваць псальмы Табе буду на гуслях, о Святы Ізраэльскі.

Радыя вусны мае, як Табе я пяю, і душа мая, што Ты спас яе.
 
Радавацца будуць мае вусны, калі буду спяваць Табе, і мая душа, якую Ты адкупіў;

І язык мой будзе што-дня абвяшчаць справядлівасьць Тваю, бо сорам і стыд на тых, што мне ліха шукаюць.
 
але і язык мой цэлы дзень разважаць будзе пра справядлівасць Тваю, бо пасаромяцца і баяцца будуць тыя, што шукаюць ліха на мяне.