Псалтыр 82 псалом
Псалтыр
Пераклад Л. Дзекуць-Малея → Пераклад Чарняўскага 2017
Псальм Асапавы.Бог стаіць сярод зграмаджэньня Божага, сярод багоў Ён суд спаўняе:
Псальм. Асафа. Бог падымаецца на божым сходзе, пасярод багоў праводзіць суд.
Дакуль будзеце судзіць несправядліва і паказваць бязбожнікам староннасьць сваю? (Зэля)
«Дакуль будзеце судзіць несправядліва і прымаць аблічча грэшнікаў?
Вядзеце справу ўбогіх і сіротаў; нешчасьлівым і бедным акажэце справядлівасьць.
Справядліва судзіце няшчаснага і сірату, апраўдвайце прыгнечанага і беднага.
Ратуйце мізэрных і ўбогіх, із рук бязбожнікаў вызваляйце!
Вырывайце беднага і вызваляйце няшчаснага з рукі грэшніка».
Ды нічога ня ведаюць, не разумеюць, і ў цемры ходзяць яны; захісталіся ўсе падваліны зямлі!
Яны не ведаюць, не разумеюць, ходзяць у цемры; захістаюцца ўсе асновы зямныя.
Хоць і сказаў Я: вы — багі, ўсе вы сыны Найвышэйшага, —
Я сказаў: «Вы ўсе — багі і сыны Узвышняга».
аднак, вы памрэцё, як людзі, паўпадаеце, як кожны з князёў.
Але ж вы памраце, як людзі, і прыйдзеце ў заняпад, як адзін з князёў.
Паўстань, о Божа, судзі зямлю, бо-ж Ты ўладар, дзедзіч усіх народаў.
Паўстань, Божа, судзі зямлю, бо Ты маеш права над усімі народамі.