Псалтыр 97 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Царуець Госпад; няхай радуецца зямля, няхай весяліцца безьліч астравоў!
 
Госпад заваладарыў! Хай радуецца зямля, хай весяляцца шматлікія астравы.

Хмары й цемра навакол Яго; справядлівасьць і права — падставы пасаду Ягонага.
 
Аблокі і туман — навокал Яго; справядлівасць і закон — гэта падмурак Яго пасаду.

Агонь ідзе наперадзе Яго і паліць наўкола ворагаў Ягоных.
 
Агонь ідзе перад Ім і паліць наўкола Яго непрыяцеляў.

Маланкі Ягоныя сусьвет асьвятляюць; бачыць гэта зямля і дрыжыць.
 
Маланкі Яго асвятляюць сусвет: бачыць і трымціць зямля.

Горы, быццам воск, таюць ад аблічча Госпадава, ад аблічча Госпада ўсенькае зямлі.
 
Горы, як воск, растапляюцца перад Госпадам, перад Госпадам сусвету.

Абвяшчаюць нябёсы справядлівасьць Яго, і ўсе народы бачаць славу Ягоную.
 
Нябёсы вяшчаюць справядлівасць Яго, а ўсе народы бачаць Яго хвалу.

Асаромяцца ўсе, што ідалам служаць, што ідаламі сваімі пахваляюцца: пакланецеся Яму, усе богі, да зямлі!
 
Хай пасаромяцца ўсе, што пакланяюцца ідалам і што выхваляюцца балванамі сваімі. Пакланіцеся Яму, усе анёлы Яго.

Чуе гэта Сыон і цешыцца, і весяляцца дачкі Юдзіны дзеля судоў Тваіх, Госпадзе!
 
Чуе гэта і весяліцца Сіён, і радуюцца гарады Юды дзеля прысудаў Тваіх, Госпадзе.

Бо Ты, о Госпадзе, над усенькай зямлёй Найвышэйшы, Ты ўзьнёсся пад усімі багамі.
 
Бо ты, Госпадзе, праслаўлены на ўвесь свет, надзвычайна ўзвышаешся Ты над усімі багамі.

Вы, што любіце Госпада, зьненавідзьце вы зло! Ён хавае душы сьвятых Сваіх, із рукі бязбожных вырывае іх.
 
Любіць Госпад тых, што ненавідзяць ліха; сцеражэ Ён душы святых, — з рукі грэшніка вызваліць іх.

Сьветласьць на пабожных зыходзе, і радасьць на шчырых сэрцам.
 
Для справядлівага ззяе святло, і для праўдзівых сэрцам — радасць.

Радуйцеся ў Госпадзе, справядлівыя, і выслаўляйце імя Ясо сьвятое!
 
Цешцеся, справядлівыя, у Госпадзе, і вызнавайце памяць святасці Яго.