Псалтыр 86 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Малітва Давідава.Прыхілі, Госпадзе, вуха Тваё ды пачуй Ты мяне, бо я бедны й убогі.
 
Просьба. Давідаў. Нахіні, Госпадзе, вуха Тваё і выслухай мяне, бо ўбогі я і бедны.

Захавай маю душу, бо я прад Табою скарыўся. Памажы Ты, мой Божа, рабу Твайму, які на Цябе спадзяецца.
 
Сцеражы душу маю, бо я цнатлівы, збаў слугу Твайго, Божа мой, які ўскладае надзею на Цябе.

Памілуй мяне, Госпадзе, бо ўвесь дзень да Цябе я гукаю.
 
Злітуйся нада мной, Госпадзе, бо да Цябе ўсклікаў я цэлы дзень.

Пацеш душу раба Твайго, бо душу да Цябе я ўзьнімаю, о Госпадзеі
 
Узвесялі душу Твайго слугі, бо да Цябе, Госпадзе, узвысіў я душу маю.

Бо Ты, о Госпадзе, добры й літасьцівы ды шчодры на ласку для ўсіх, што Цябе прызываюць.
 
Бо Ты ж, Госпадзе, добры і ласкавы, і вялікая міласэрнасць [Твая] да ўсіх, што прызываюць Цябе.

Пачуй, о Госпадзе, малітву маю і выслухай маленьне маё галоснае!
 
Успрымі вушамі, Госпадзе, малітву маю і звярні ўвагу на голас малення майго.

У час тугі маёй я клічу Цябе, бо Ты мяне выслухаеш.
 
У дзень бяды маёй клічу я Цябе, бо ведаю, што Ты выслухаеш мяне.

Няма між багамі роўнага Табе, Госпадзе, і няма дзел, як Твае.
 
Няма Табе, Госпадзе, роўнага між багоў і няма нічога [такога ж], як справы Твае.

Усе народы, што Ты іх стварыў, прыйдуць і ніцма ўпадуць прад Табою, о Госпадзе, і імя Тваё будуць славіць.
 
Прыйдуць усе народы, якія Ты стварыў, і паклоняцца Табе, Госпадзе, і славіць будуць яны Тваё імя.

Бо Ты вялікі і цуды робіш, — Ты Бог, Ты адзін.
 
Бо вялікі Ты і творыш цуды. Ты толькі адзін Бог.

Навучы мяне, Госпадзе, шляху Твайго, каб хадзіў я ў праўдзе Тваёй; сэрца маё украпі ў баязьні іменьня Твайго.
 
Навучы мяне, Госпадзе, шляху Твайму, і буду хадзіць я ў праўдзе Тваёй; зрабі шчырым сэрца маё, каб шанавала яно імя Тваё.

І буду ўсім сэрцам маім хваліць Цябе, Госпадзе, Бог мой, і імя Тваё буду славіць навекі.
 
Буду вызнаваць Цябе, Госпадзе, усім сэрцам маім і буду вечна праслаўляць імя Тваё,

Бо ласка Твая нада мною вяліка, і Ты вырваў душу маю з бяздоньня пякельнага.
 
бо міласэрнасць Твая да мяне вялікая і вырваў Ты душу маю з пекла апраметнага.

Божа, гордыя супраць мяне збунтаваліся, і натоўп перасьледавацеляў шукае душу маю, ды на Цябе не зважаюць яны.
 
Божа, пыхліўцы паўсталі супраць мяне, і зграя моцных шукае душу маю; і не паставілі яны Цябе перад сабою.

Але Ты, Госпадзе, Бог міласэрны й ласкавы, да гневу няскоры і ласкай ды праўдай багаты.
 
А Ты, Госпадзе, Бог міласэрны і літасцівы, і цярплівы, вялікай спагаднасці і праўды,

Да мяне зьвярніся й зьмілуйся нада мной; дай сілу Тваю рабу Твайму і сыну рабыні Тваёй памажы!
 
глянь на мяне і злітуйся нада мною, дай сілу Тваю слузе Твайму і збаў сына служанкі Сваёй.

Зьяві Ты на мне знак Тваёй дабраты, каб угледзілі гэта і тыя, што ненавідзяць мяне, і паўстыдаліся-бы, што Ты, о Госпадзе, мне дапамог і пацешыў мяне.
 
Учыні са мною знак на дабро, каб убачылі тыя, што ненавідзяць мяне, і пасаромеліся, бо Ты, Госпадзе, дапамог мне і пацешыў мяне.