Псалтыр 85 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Кіраўніку хору: сыноў Карэявых. Псальм.
 
Кіраўніку хору. Сыноў Корэ. Псальм.

Ты зьлітаваўся над зямлёй Тваёй, Госпадзе, Ты палон Якубавы вярнуў.
 
Спагадным быў Ты, Госпадзе, у Тваёй зямлі, перавярнуў Ты паланенне Якубава.

Ты зьняў віну з народу Твайго, дараваў ім усе грахі іхнія. (Зэля)
 
Адпусціў Ты несправядлівасць народа Твайго, дараваў усе грахі іх.

Ты зьдзяржаў Тваю ярасьць і гнеў Твой палючы адвярнуў.
 
Спыніў Ты ўвесь гнеў Твой, адступіўся ад абурэння раздражнёнасці Тваёй.

Адбудуй Ты нас, Божа, Успамога наша, супыні абурэньне Тваё на нас.
 
Навярні нас, Божа, збаўленне наша, і адвядзі гнеў Твой ад нас.

Няўжо-ж навекі на нас будзеш гневацца і гнеў Твой пашырыш на пакаленьні патомныя?
 
Ці ж вечна будзеш гневацца на нас, ці ж прадоўжыш гнеў Твой з пакалення ў пакаленне?

Няўжо-ж не дасі нам аджыць нанова, каб народ Твой узрадаваўся ў Табе?
 
Няўжо Ты, навярнуўшы, не ажывіш нас і народ Твой не ўзвесяліцца з Табою?

Дай нам, Госпадзе, ўбачыць ласку Тваю, даруй нам спасеньне Тваё!
 
Госпадзе, пакажы нам Тваю міласэрнасць і дай нам Тваё збаўленне.

Паслухаю я, што Госпад Бог кажа: Ён гаворыць аб супакоі для народу Свайго і для пабожных Сваіх, для тых, што сэрца сваё да Яго кіруюць. (Зэля)
 
Паслухаю, што кажа Госпад Бог, бо, напэўна, вясціць Ён мір народу Свайму, і святым Сваім, і тым, якія ўсім сэрцам навяртаюцца да Яго.

Запраўды, блізка ўспамога Яго дзеля тых, што баяцца Яго, каб слава Божая на зямлі нашай залунала.
 
Сапраўды блізкае збаўленне Яго для тых, што шануюць Яго, каб пасялілася слава на зямлі нашай.

Ласка і праўда з сабой сустракаюцца, справядлівасьць і супакой цалуюцца.
 
Міласэрнасць і праўда спаткаюцца паміж сабою, справядлівасць і мір пацалуюцца.

Праўда вырастае із зямлі, а справядлівасьць з нябёсаў пазірае.
 
Вернасць узнікне з зямлі, а справядлівасць прагляне з неба.

І абдорыць нас Госпад добрым, а зямля наша дасьць свой плод.
 
Бо Госпад дасць добразычлівасць, а зямля наша дасць плод свой.

Ідзе справядлівасьць наперадзе Яго і стопы Ягоныя на шлях стаўляе.
 
Справядлівасць пойдзе перад Ім, і паставіць на дарозе крокі свае.