Псалтыр 68 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Кіраўніку хору: Псальм Давідавы дзеля пяяньня.
 
Кіраўніку хору. Давідаў. Псальм. Песня.

Няхай устане Бог, і рассыплюцца ворагі Яго, і ўцякуць прад абліччам Ягоным, хто Яго ненавідзіць.
 
Паўстае Бог, і рассейваюцца непрыяцелі Яго; і ўцякаюць ад аблічча Яго тыя, што ненавідзяць Яго.

Як разьвяваецца дым, так яны разьвеяны будуць; як таець воск ад агню, так бязбожнікі згінуць прад абліччам Божым.
 
Як рассейваецца дым, Ты рассееш іх; як плавіцца воск ад агню, так згінуць грэшнікі ад Бога.

А пабожныя ўзрадуюцца, весяліціся будуць прад Божым абліччам і славіць ад радасьці.
 
Справядлівыя ж будуць весяліцца і радавацца перад Богам і адчуюць асалоду ў весялосці.

Сьпявайце Богу, імя Яго выслаўляйце! Дарогу рабеце Таму, што праз пустыню праносіцца, — Госпад імя Яму! — і прад абліччам Яго весяліцеся,
 
Спявайце Богу, спявайце псальм імю Яго; учыніце дарогу Таму, Які ўзносіцца над аблокамі: імя Яму — Госпад. Усклікайце радасна перад Ім;

перад Бацькам сіротаў і Заступнікам удоў, Богам у сьвятой сялібе Ягонай,
 
бацька сірот і суддзя ўдоў, Бог у доме Сваім святым.

Богам, што выгнанцаў варачае ў бацькаўшчыну, што вязьняў із путаў іх вызваляе, але ў пустыні сьпякотнай пакідае упорыстых.
 
Бог, Які селіць пакінутых у доме, Які выводзіць вязняў да дабрабыту; між тым бунтаўнікі будуць жыць на няплоднай зямлі.

Божа, калі Ты йшоў прад народам Тваім наперадзе, калі праз пустыню праходзіў, (Зэля)
 
Божа, калі ішоў Ты перад народам Тваім, калі праходзіў Ты па пустыні,

дык траслася зямля, і нябёсы прад абліччам Тваім тапіліся, дый гэты Сыон дрыжэў перад Госпадам, Богам Ізраіля.
 
зямля здрыганулася, нават нябёсы струмяніліся перад Богам Сіная, перад Богам Ізраэля.

Ты шчодрым дажджом акрапляў Тваю спадчыну, Божа, ды падмацовываў тое, што зьнямагалася.
 
Выпусціў Ты, Божа, дождж самаўладна; спадчына Твая саслабела — Ты ж аднавіў яе.

Там народ Твой асеў; з дабраты Тваяе Ты наладжываў для гарапашных.
 
Жывыя стварэнні Твае жылі там, падрыхтаваў Ты [усё] для беднага ў дабраце Сваёй.

Госпад кліч клікнуў, і многае множства весьніц адолі было:
 
Госпад дае слова і абвяшчаюць добрае, вялікае мноства:

Цары войск уцякаюць, бягуць, гаспадыня-ж у доме дзеліць дабычу!
 
«Цары войскаў уцякаюць, уцякаюць, а краса дому дзеліць здабычу.

Між абораў ці хочаце легчы? Вы сталіся, быццам галубка, што крыльле ў яе з серабра, а пёры золатам зелянявым пакрыліся.
 
А вы спіце ў агароджах сваіх: крылы галубіцы ззяюць срэбрам, а пер’е іх — яснасцю золата.

Калі Ўсемагутны рассыпаў цароў зямлі гэтай, яна пабялела, як сьнег на гары Сальмонскай.
 
Калі разганяе па ёй цароў Усемагутны, снегам бялеецца Сэлмон».

Гара Божая ёсьць гара Базанская! многа вяршын мае гара Базанская.
 
Гара Божая — гара Басан, гара крутая — гара Басан.

Чаму вы, горы шматверхія, завісна глядзіцё на гару, што Госпад выбраў яе на сялібу Сабе? Але, і навекі Госпад жыць тамака будзе.
 
Што глядзіце вы з пагардаю, горы крутыя, на гару, дзе спадабалася пасяліцца Богу? Бо Госпад паселіцца навечна.

Божых вазоў мірыяды, тысячы тысячаў Ангелаў; сярод іх Госпад, як на Сынаі, бытуе ў Сьвятыні.
 
Калясніц Божых дзесяць тысяч тысяч: Госпад прыходзіць з Сіная ў святое месца.

Ты ўзышоў на гару й вёў палон; Ты дары прыняў дзеля людзей; і навет Твае супраціўнікі мусяць пры Госпадзе жыці.
 
Узышоў ты на вышыню, палоннага прывёў у палон; атрымаў людзей у падарунак, каб нават бунтаўнікі пасяліліся ў Госпада Бога.

Няхай будзе пахвалены Госпад! З дня на дзень Ён нас носе, Бог — наша ўспамога. (Зэля)
 
Дабраславёны Госпад штодня; панясе нас Бог збавенняў нашых.

Бог ёсьць нам Бог спасеньня, і брамаю сьмерці Госпад Бог валадае.
 
Бог наш, Бог дзеля збаўлення; і ў Госпада, у Госпада — брама смерці.

Запраўды, скрышыць Бог галаву сваіх ворагаў, цемя тых, што закаранеўшы ў беззаконьні ходзяць.
 
Але ж Бог знясе галовы Сваім непрыяцелям, валасатую чупрыну — тым, хто трывае ў сваіх злачынствах.

Сказаў Госпад: З Базану вярну іх, дастану з глыбіняў марскіх,
 
Госпад сказаў: «Ад Басана прывяду назад, выведу назад з глыбіні марской,

каб стапу тваю ты замачыў у крыві, а сабакі твае — языкі ў крыві ворагаў.
 
каб намачылася нага твая ў крыві, каб язык тваіх сабак атрымаў кавалак ад непрыяцеляў».

І бачылі, Божа, паход Твой яны, паход Бога майго і Цара майго у Сьвятыні:
 
Убачылі яны шэсце Тваё, Божа, шэсце Бога майго, Цара майго, у святое месца.

сьпявакі наперадзе йшлі, наканцы — гусьляры, пасярэдзіне — дзевы з цымбаламі.
 
Наперадзе ішлі спевакі, апошнімі ідуць гусляры, у цэнтры — дзяўчаты з бубнамі.

Слаўце Госпада Бога ў грамадзе, вы, што з насеньня Ізраіля!
 
У святынях дабраслаўляйце Бога, Госпада, вы, ад вытокаў Ізраэля.

Там Бэньямін, наймалодшы, пануе над імі; старшыні Юдзіны — іх валадары; старшыні Забулонавы, старшыні Нахталімавыя з іх грамадою.
 
Там маладзенькі Бэньямін, што ўладарыць імі, князі Юды з харугвай сваёю, князі Забулона, князі Нэфталі.

Пашлі, о Божа, сілу Тваю! Умацуй, Божа, тое, што для нас учыніў!
 
Даручы, Божа, магуццю Твайму; умацуй тое, Божа, што ты стварыў у нас!

Дзеля Сьвятыні Тваёй цары будуць прыносіць дары ў Ерузалім.
 
У святыні Тваёй, у Ерузаліме, цары прынясуць Табе дары!

Угамуй зьвера ў чароце, стада быкоў сярод цялятаў народных: яны пахваляюцца зьліткамі срэбра; расьцяруш народы, што жадаюць вайны!
 
Напалохай звера ў трыснягу, статак быкоў сярод цялят народаў, якія хваляцца зліткамі срэбра. Разгані народы, якія імкнуцца да войнаў.

Прыйдуць волаты з Эгіпту, Этыопія працягне рукі свае да Бога.
 
Хай прыйдуць магнаты з Егіпта, хай Этыёпія працягне рукі свае да Бога.

Царствы зямныя! Сьпявайце Богу, выслаўляйце Госпада, (Зэля)
 
Валадарствы зямныя, спявайце Богу, грайце Госпаду, грайце Богу.

Які носіцца па нябёсах найвышэйшых, адвечных. Там Ён голас Свой падае — голас магутны!
 
Які імкнецца паўздоўж неба нябёсаў на ўсход; вось, падасць Ён голас Свой, голас магуцця.

Прызнайце моц Божую! Веліч Ягоная над Ізраілем, магутнасьць Яго — у хмарах.
 
Прызнайце магуцце за Богам. Вышэй за Ізраэль веліч Яго, і магуцце Яго — у аблоках.

Страшны зьяўляецца Бог із Сьвятыні Сваёй; Бог Ізраіляў, Ён сілу ды моц народу даець. Няхай будзе пахвалены Бог!
 
Дзівосны Ты, Божа, ад святога месца Твайго! Бог Ізраэля Сам надасць магуцце і моц Свайму люду. Дабраславёны Бог!