Псалтыр 94 псалом
Псалтыр
Пераклад Л. Дзекуць-Малея → Пераклад Чарняўскага 2017
Божа помсты, Госпадзе, Божа помсты, зьявіся!
Бог помстаў, Госпадзе! Божа, Бог помстаў, заззяй!
Узьніміся, Судзьдзя зямлі, адплаці гордым за тое, што зрабілі яны!
Узвысся Ты, што судзіш зямлю, аддай заплату пыхлівым.
Дакуль-жа, Госпадзе, дакуль-жа весяліціся будуць бязбожнікі?
Дакуль жа бязбожнікі, Госпадзе, дакуль жа бязбожнікі будуць задавацца?
Словы дзёрзкія гавораць яны, пышаюцца ўсе, што беззаконнае робяць.
Будуць вымаўляць і прамаўляць нахабствы, будуць выхваляцца ўсе тыя, што чыняць несправядлівасць?
Прыгнятаюць яны народ Твой, о Госпадзе, Тваю спадчыну яны ўціскаюць.
Прыніжаюць яны, Госпадзе, народ Твой, прыгнятаюць спадчыну Тваю.
Удавіц і захаджалых душаць яны, і сіротак яны забіваюць,
Удаву і прыхадня забіваюць і сірот мардуюць.
і кажуць: Ня ўгледзіць гэтага Госпад, і ня зьведае Бог Якубавы!
І кажуць яны: «Не бачыць Госпад, не разумее Бог Якубаў».
Апамятайцеся, людзі бязглуздыя! І калі, сьляпакі, набярэцёся розуму?
Зразумейце, неразумныя ў народзе, бязглуздыя, калі паразумнееце?
Ці-ж Той, што вуха стварыў, не пачуе? Ці, хто кшталт воку надаў, не пабачыць?
Ці ж Той, Хто насадзіў вуха, не пачуе? Або Той, што сфармаваў вока, не ўбачыць?
Ці-ж Той, што навучае народы, ня будзе вінаваціць, — Ён, што чалавеку веду дае?
Ці ж Той, Хто спасцігае народы, не выкрые, Той, Хто вучыць чалавека разуменню?
Госпад ведае думкі чалавечыя, што яны — подмух марны.
Госпад ведае думкі людзей, што яны марныя.
Шчасьлівы чалавек, якога Ты, Госпадзе, навучаеш і вучыш законаў Тваіх,
Шчасны той чалавек, якога ўдасканальваеш Ты, Госпадзе, і паводле закону Твайго навучаеш яго,
каб даць яму супакой у дні ліхія, пакуль выкапан будзе дол для бязбожніка.
каб даць адпачыць яму ад ліхіх дзён, пакуль выкапаюць магілу для грэшніка.
Бо Госпад народу Свайго не адапхне, і не пакіне Ён Сваёй спадчыны.
Бо не адкіне Госпад свайго народа і не пакіне спадчыны сваёй.
Бо зьвернецца суд к справядлівасьці, і пойдуць за ім усе шчырыя сэрцам.
Бо суд вернецца да справядлівасці, і пойдуць за ёю ўсе, хто праўдзівага сэрца.
Хто за мяне супраць злачынцаў паўстане? Хто заступіцца супраць тых, што беззаконнае робяць?
Хто стане за мяне супраць ліхадзеяў або хто стане разам са мною супраць тых, што чыняць несправядлівасць?
Каб ня Госпад мне быў успамогай, дык хіба ўжо душа мая супачывала-б у маўчаньні.
Каб Госпад не ўспамог, хутка душа мая апынулася б у краіне маўклівасці.
Калі я думаў: Хістаецца нага мая! — дык ласка Твая, Госпадзе, падтрымала мяне.
Калі гавару я: «Нага мая хістаецца», міласэрнасць Твая, Госпадзе, падтрымлівае мяне.
Калі шмат дум цяжкіх было ў сэрцы маім, пацяшэньні Твае напаўнялі душу мне раскошай.
Калі мноства турбот маіх у сэрцы маім, Твае суцяшэнні ўзвесяляюць маю душу.
Ці-ж можа лучыцца з Табою пагібелі судзішча, што супраць права й закону гвалт чыніць?
Ці ж будзе з Табою сябраваць пасад несправядлівасці, які пад выглядам прыказання творыць пакуту?
Грамадай яны выступаюць супраць душы справядлівага і бязьвінную кроў засуджаюць.
Яны накідваюцца на душу справядлівага і асуджаюць кроў бязвінную.
Але Госпад стаўся цьвярдыняй маёй, Бог мой — скала мая, што дае мне прытулішча.
І стаўся мне Госпад абаронаю і Бог мой — скалою прыстанішча майго;
І зьвярнуў Ён на іх беззаконьне іхняе і ў злосьці іхняй іх зьніштажае; зьніштажае іх Госпад, Бог наш.
і аддасць Ён ім іх несправядлівасць і ў ліхадзейнасці іх знішчыць іх. Знішчыць іх Госпад Бог наш.