Псалтыр 92 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Псальм. Песьня на дзень суботні.
 
Псальм. Песня. На дзень шабату.

Добра хваліці Госпада й славіць імя Тваё, Найвышэйшы!
 
Як жа добра вызнаваць Госпада і спяваць псальмы імю Твайму, Найвышэйшы!

Абвяшчаць спазаранку ласку Тваю і праўду Тваю ўначы
 
Раніцай абвяшчаць Тваю міласэрнасць, і праўду Тваю — уначы.

на дзесяціструннай і арфе, на струнах гусьляў іграючы.
 
На дзесяціструнным, і на гуслях, са спевам пад цытру.

Бо Ты ўзьвесяліў мяне, Госпадзе, Тваімі дзеяньнямі, аб творах рук Тваіх радасна пяю.
 
Бо пацешыў Ты мяне, Госпадзе, Сваім стварэннем, і я буду радавацца справам рук Тваіх.

Як вялікі дзеяньні Тваі, о Госпадзе; назьдзіў глыбокія мысьлі Твае.
 
Якія ж велічныя справы Твае, Госпадзе: надзвычай глыбокімі сталіся задумы Твае!

Чалавек бязглузды ня зьведае гэтага, і сьляпак ня сьцяміць.
 
Неразумны чалавек не спазнае і бязглузды не зразумее гэтага.

Калі бязбожныя растуць, як трава, і злачынцы цьвітуць, — дык каб навек яны былі зьніштожаны!
 
Няхай грэшныя разрастуцца, як трава, і будуць квітнець усе тыя, што чыняць несправядлівасць, аднак гэта будзе [ім] на згубу на векі вечныя;

Ты-ж, Госпадзе, навекі ў вышыні нябёсаў!
 
а Ты, Госпадзе, вечна Найвышэйшы.

Бо-ж вось ворагі Тваі, Госпадзе, бо-ж вось ворагі Тваі гінуць, і расьцярушываюцца ўсе, што робяць беззаконнае.
 
Бо вось, непрыяцелі Твае, Госпадзе, бо вось, непрыяцелі Твае загінуць і расцярушацца ўсе, што чыняць несправядлівасць.

Але мой рог Ты ўзносіш, як-бы ў аднарожца, а я памазаны алеем сьвятым.
 
Ты ўзвысіш рог мой, як у адзінарога, атрымаў я багатае намашчэнне алейкам.

І вока маё пацяшацца будзе над ворагамі маімі, і чуюць вушы мае аб злачынцах, што супраць мяне збунтаваліся.
 
Вока маё з пагардаю глядзела на непрыяцеляў маіх, ды пра загубу ліхотнікаў, што паўстаюць на мяне, пра ліхадзеяў радасна слухала вуха маё.

Пабожны быццам пальма разрастаецца, ён расьце, як той кедр на Лібане.
 
Справядлівы будзе квітнець, як пальма; быццам кедр лібанскі, узрасце.

Насаджаныя ў доме Гасподнім, яны расцьвітаюць на панадворках Бога нашага.
 
Пасаджаныя ў Госпадавым доме, у дзядзінцы Бога нашага заквітнеюць.

Яны плод свой даюць і ў старасьці, яны сакавіты і сьвежыя,
 
Будуць прыносіць плады ў старасці, сакавітыя будуць і поўныя свежасці,

каб абвяшчаць, што Госпад справядлівы, цьвярдыня мая, і няма ў Ім няпраўды.
 
Каб вясціць, што Госпад справядлівы, прыстанішча маё, і няма несправядлівасці ў Ім.