Псалтыр 91 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Шчасьлівы той, хто жыве пад заслонай Найвышэйшага ды пад ценем Усемагутнага.
 
Хто жыве ў апецы Найвышэйшага і прабывае ў засені Усемагутнага,

Кажу я да Госпада: Ты мой прыпынак і цьвярдыня мая, мой Бог, на якога спадзяюся.
 
кажа ён Госпаду: «Ты прыпынак мой і цвярдыня мая, Божа мой; я маю надзею на Яго».

Бо-ж Ён ратуе цябе ад сеці лаўца, ад мору сьмяротнага.
 
Бо Ён Сам вызваліць цябе з пасткі паляўнічых, ад нягоднага слова.

Пер’ем Сваім закрывае цябе, і пад крыльлем Ягоным схаваешся; праўда Яго — шчыт і заслона.
 
Агорне Ён цябе Сваімі крыламі, і пад пер’ем Яго схаваешся; шчыт і заслона — праўда Яго.

Не палохайся страхаў начных, ні стралы, што ўдзень ляціць,
 
Не будзеш баяцца жахаў начных, ані стралы, што ляціць удзень.

ня бойся мору, што ў цемры крадзецца, заразы, што ў палудзень пустошыць.
 
Ані заразы, што бадзяецца ў цемры, ані пошасці, што пустошыць апоўдні.

Хоцьбы тысячы побач з табой паляглі й мірыяды праваруч ад цябе, да цябе яна не падыйдзе.
 
Хоць падзе пры баку тваім тысяча, а дзесяць тысяч праваруч, ты ўсцеражэшся.

Толькі вачыма тваімі глядзець будзеш і ўбачыш з бязбожнымі расплату.
 
Сапраўды, пабачыш на ўласныя вочы, і паглядзіш на адплату грэшнікам.

За тое, што ты казаў: Госпад — надзея мая, — ды Найвышэйшага выбраў сабе за прыпынак,
 
Бо Ты, Госпадзе, прыстанішча маё, учыніў ты Найвышэйшага паселішчам тваім.

ня сустрэне няшчасьце цябе, і пошасьць не падыйдзе да палаткі тваёй.
 
Не падступіцца да цябе ліха і бізун не наблізіцца да палаткі тваёй,

Бо Ён дасьць загад аб табе Сваім Ангелам, каб цябе сьцераглі на ўсіх сьцежках тваіх.
 
бо загадаў Ён анёлам сваім наконт цябе, каб сцераглі цябе на ўсіх тваіх дарогах.

На руках сваіх панясуць цябе, каб нага твая не спаткнулася аб камень.
 
На руках будуць насіць цябе, каб часам не скалечыў аб камень нагі сваёй.

На львоў і гадаў ступаці будзеш, львянятаў і зьмеяў патопчаш.
 
На змяю і яшчарку наступіш, ды растопчаш ільва і дракона.

За тое, што Мяне ўзьлюбіў ён, спасу яго; узвышу яго, бо імя Маё ведае.
 
Паколькі прытуліўся ён да Мяне, вызвалю яго; падтрымаю яго, бо спазнаў ён імя Маё.

Будзе клікаць Мяне, дык Я выслухаю яго; пры ім Я ў тузе, вызвалю яго ды услаўлю.
 
Будзе клікаць мяне, і Я выслухаю яго, у бядзе Я разам з ім, вырву яго і ўслаўлю яго.

Насычу яго доўгім векам і спасеньне Маё дам угледзіць.
 
Напоўню яго доўгасцю дзён і пакажу яму збаўленне Маё.