Псалтыр 91 псалом

Псалтыр
Пераклад Антонія Бокуна → Пераклад Чарняўскага 2017

 
 

Той, які жыве пад заслонай Найвышэйшага і пад ценем Усемагутнага,
 
Хто жыве ў апецы Найвышэйшага і прабывае ў засені Усемагутнага,

кажа да ГОСПАДА: «Ты — прыстанішча маё і цьвярдыня мая, Бог мой, на Якога я спадзяюся».
 
кажа ён Госпаду: «Ты прыпынак мой і цвярдыня мая, Божа мой; я маю надзею на Яго».

Бо Ён выратуе цябе ад пасткі птушкалова, ад пошасьці сьмяротнай.
 
Бо Ён Сам вызваліць цябе з пасткі паляўнічых, ад нягоднага слова.

Пер’ем Сваім закрые цябе, і пад крыламі Ягонымі будзеш мець надзею; праўда Ягоная — шчыт і заслона.
 
Агорне Ён цябе Сваімі крыламі, і пад пер’ем Яго схаваешся; шчыт і заслона — праўда Яго.

Не спалохаешся страху ўначы, ані стралы, якая ўдзень ляціць,
 
Не будзеш баяцца жахаў начных, ані стралы, што ляціць удзень.

ані пошасьці, якая ў цемры прыходзіць, ані заразы, якая сярод белага дня пустошыць.
 
Ані заразы, што бадзяецца ў цемры, ані пошасці, што пустошыць апоўдні.

Тысяча побач з табой упадзе і дзесяць тысячаў праваруч ад цябе, а да цябе яна не падыйдзе.
 
Хоць падзе пры баку тваім тысяча, а дзесяць тысяч праваруч, ты ўсцеражэшся.

Толькі вачыма тваімі глядзець будзеш і ўбачыш з бязбожнымі расплату.
 
Сапраўды, пабачыш на ўласныя вочы, і паглядзіш на адплату грэшнікам.

За тое, што ты ГОСПАДА, прыбежышча сваё, і Найвышэйшага выбраў за сялібу сабе,
 
Бо Ты, Госпадзе, прыстанішча маё, учыніў ты Найвышэйшага паселішчам тваім.

не спаткае цябе злое, і пакараньне не наблізіцца да намёту твайго.
 
Не падступіцца да цябе ліха і бізун не наблізіцца да палаткі тваёй,

Бо Ён анёлам Сваім загадае пра цябе, каб захоўвалі цябе на ўсіх шляхах тваіх.
 
бо загадаў Ён анёлам сваім наконт цябе, каб сцераглі цябе на ўсіх тваіх дарогах.

На руках панясуць цябе, каб не спатыкнуўся аб камень нагою тваёю.
 
На руках будуць насіць цябе, каб часам не скалечыў аб камень нагі сваёй.

Па ільвах і гадзюках хадзіць будзеш, львянятаў і цмокаў патопчаш.
 
На змяю і яшчарку наступіш, ды растопчаш ільва і дракона.

«За тое, што ён Мяне ўзьлюбіў, збаўлю яго; узвышу яго, бо імя Маё ведае.
 
Паколькі прытуліўся ён да Мяне, вызвалю яго; падтрымаю яго, бо спазнаў ён імя Маё.

Будзе клікаць Мяне, і Я адкажу яму; у бядзе Я буду з ім, выратую яго і ўшаную яго.
 
Будзе клікаць мяне, і Я выслухаю яго, у бядзе Я разам з ім, вырву яго і ўслаўлю яго.

Доўгімі днямі насычу яго і дам убачыць збаўленьне Маё».
 
Напоўню яго доўгасцю дзён і пакажу яму збаўленне Маё.