Псалтыр 50 псалом
Псалтыр
Пераклад Антонія Бокуна → Пераклад Чарняўскага 2017
Псальм Асафа. Бог багоў, ГОСПАД прамовіў і кліча зямлю ад усходу сонца да захаду яго.
Псальм. Асафа. Бог багоў Госпад прамовіў і паклікаў зямлю ад усходу сонца аж на захад.
З Сыёну, вяршыні прыгажосьці, зазьзяў Бог.
З Сіёна, поўнага красы, заззяў Бог.
Прыйдзе Бог наш і ня будзе маўчаць, перад абліччам Ягоным агонь палючы, навакол Яго — бура вялізарная.
Бог наш прыйшоў і не маўчыць: агонь паглынаючы перад Ім, а вакол Яго магутная навальніца.
Ён кліча неба, што ўверсе, і зямлю на суд народу Свайго:
Кліча Ён зверху неба і зямлю, каб судзіць народ Свой:
«Зьбярыце да Мяне багабойных Маіх, якія заключылі запавет са Мною пры ахвяры!»
«Збярыце да мяне святых Маіх, якія ўпарадкавалі запавет Мой праз ахвяру».
І будуць тады нябёсы апавядаць пра праведнасьць Ягоную, бо Сам Бог [ёсьць] Судзьдзя. (Сэлях)
І абвяшчаюць нябёсы Яго справядлівасць, бо Бог ёсць Суддзя.
«Слухай, народзе Мой, і Я буду гаварыць. Ізраілю, Я буду сьведчыць супраць цябе. Бог, твой Бог — гэта Я!
Паслухай, народзе Мой, Я буду прамаўляць! Ізраэль, Я буду сведчыць супраць цябе: «Я Бог, Я твой Бог.
Не за ахвяры твае Я буду вінаваціць цябе, цэласпаленьні твае перада Мною заўсёды!
Не буду вініць цябе за твае ахвяры, твае цэласпаленні заўсёды перада Мною.
Не вазьму Я быкоў з дому твайго, ані казлоў з абораў тваіх,
Не прыму з дому твайго цялятаў ані казлоў са статкаў тваіх.
бо Мае ўсе зьвяры лясныя і скаціна, што тысячамі [ходзіць] па гарах.
Бо маімі з’яўляюцца ўсе лясныя звяры, [кожная] жывёла на тысячах гор.
Я ведаю ўсіх птушак у гарах, і зьвяры палявыя — у Мяне.
Знаю Я ўсіх паднебных птушак, і тое, што на полі варушыцца, вядома Мне.
Калі б Я згаладаўся, табе б Я не сказаў, бо Мой сусьвет і тое, што напаўняе яго.
Калі захачу есці, не скажу табе, бо мой увесь свет і ўсё, што яго запаўняе.
Ці ж Я ем мяса валоў і п’ю кроў казлоў?
Ці ж буду Я есці мяса валовае або піць кроў казліную?
Ахвяруй падзяку Богу, і споўні перад Найвышэйшым абяцаньні твае.
Складай ахвяру Богу на хвалу і перадавай твае малітвы з абяцаннямі Найвышэйшаму».
І кліч Мяне ў дзень трывогі, Я выратую цябе, і будзеш ушаноўваць Мяне».
А тады пакліч Мяне ў дзень бяды, і Я ўратую цябе, і ты будзеш ганараваць Мяне.
А да бязбожніка сказаў Бог: «Навошта ты пералічваеш пастановы Мае, узьнімаеш запавет Мой да вуснаў тваіх,
Грэшніку ж кажа Бог: «Чаму ты распавядаеш прыказанні Мае і прымаеш запавет Мой у вусны?
і ненавідзіш настаўленьне, і словы Мае за сябе кідаеш?
Ты ж ненавідзіш павучанне і адкідаеш словы Мае назад.
Калі бачыш злодзея, маеш упадабаньне ў ім, і з чужаложнікамі частка твая.
Убачыўшы злодзея, ты бяжыш разам з ім і з распуснікамі ты дружыш.
Вусны твае ты расчыняеш на злое, і язык твой кнуе падступнае.
Вусны свае распускаеш ты на непрыстойнасці, і язык твой пляце хітрыкі.
Ты сядзіш і супраць брата твайго гаворыш, абмаўляеш сына маці тваёй.
Седзячы, гаварыў ты супраць брата твайго і зневажаў сына маці тваёй.
Гэтак ты рабіў, а Я маўчаў. Дык здалося табе, што Я такі самы, як ты! Але Я буду караць цябе і пастаўлю [справы твае] перад вачыма тваімі».
Гэтак ты чыніш, а Я маўчу. Ці не думаеш ты, што Я быў падобны да цябе? Я буду абвінавачваць цябе, і адкрыю гэта [ўсё] перад табою.
Зважайце цяпер на гэта вы, што Бога забываеце, каб Я не схапіў [вас], бо ня будзе каму вызваліць.
Зразумейце гэта вы, што забываеце пра Бога; калі схаплю вас Я, то не будзе каму вас ратаваць.
Хто ахвяруе падзяку, той ушаноўвае Мяне, і хто парадкуе шлях свой, таму Я пакажу збаўленьне Божае.
Хто складзе ахвяру хвалы, уславіць Мяне; таму, хто беззаганны на шляху [сваім], пакажу Я збаўленне Божае».
