Псалтыр 135 псалом
Псалтыр
Пераклад Антонія Бокуна → Пераклад Чарняўскага 2017
Альлелюя! Хвалеце імя ГОСПАДА, хвалеце, слугі ГОСПАДА,
Алілуя. Хваліце імя Госпада, хваліце, слугі Госпадавы,
якія стаіцё ў Доме ГОСПАДА, у панадворках Дому Бога нашага!
вы, што стаіце ў доме Госпадавым, на дзядзінцы дому Бога нашага.
Хвалеце ГОСПАДА, бо добры ГОСПАД; выслаўляйце імя Ягонае, бо яно цудоўнае.
Хваліце Госпада, бо Госпад добры; спявайце псальмы імю Яго, бо яно мілае.
Бо Якуба выбраў для Сябе ГОСПАД, Ізраіля — на ўласнасьць Сабе.
Бо Госпад выбраў сабе Якуба, Ізраэля на ўласнасць Сваю.
Бо ведаю я, што ГОСПАД вялікі, і Госпад наш — па-над усімі багамі.
Бо я спазнаў, што вялікі Госпад, і Бог наш [вышэйшы] за ўсіх багоў.
Усё, што даспадобы ГОСПАДУ, робіць Ён у небе і на зямлі, у моры і ў-ва ўсіх бяздоньнях.
Усё, што толькі захоча Госпад, здзейсніць Ён на небе і на зямлі, на моры і ва ўсіх глыбінях вадзяных.
Ён уздымае хмары ад краю зямлі, робіць маланкі і дождж, выводзіць вецер са скарбніцы Сваёй.
Прыганяе хмары з канца зямлі, выклікае дождж маланкамі; выводзіць Ён вятры з клецяў Сваіх.
Ён пабіў першародных у Эгіпце, ад чалавека і да скаціны.
Ён перабіў першынцаў у Егіпце, так людзей, як і жывёлу.
Ён паслаў знакі і цуды пасярод цябе, Эгіпце, над фараонам і ўсімі слугамі ягонымі.
Паказаў знакі і цуды пасярод цябе, Егіпет, для фараона і для ўсіх слуг яго.
Ён пабіў шматлікія народы і забіў валадароў магутных:
Ён перабіў многа народаў паганскіх і забіў цароў дужых:
Сыгона, валадара Амарэйскага, і Ога, валадара Башану, і ўсе валадарствы Ханаану.
Сэгона, цара амарэяў, і Ога, цара Басана і ўсе царствы Ханаанскія.
І аддаў зямлю іхнюю ў спадчыну, у спадчыну Ізраілю, народу Свайму.
А зямлю іх перадаў на пасяленне, на пасяленне Ізраэлю, Свайму народу.
ГОСПАДЗЕ, імя Тваё на вякі! ГОСПАДЗЕ, памяць Твая з пакаленьня ў пакаленьне!
Госпадзе, вечнае імя Тваё; памяць пра Цябе — на ўсе пакаленні.
Бо ГОСПАД будзе судзіць народ Свой і пашкадуе слугаў Сваіх.
Бо Госпад апякуецца над народам Сваім і злітуецца над слугамі Сваімі.
Ідалы народаў — срэбра і золата, творы рук чалавечых.
Ідалы паганаў — гэта срэбра і золата, творы рук людскіх:
Маюць вусны, і не гавораць, маюць вочы, і ня бачаць;
маюць вусны, а не гавораць; маюць вочы, а не бачаць;
маюць вушы, і ня чуюць, і духу няма ў вуснах іхніх.
маюць вушы, а не чуюць, і няма подыху ў вуснах іх.
Падобныя да іх будуць тыя, што робяць іх, усе, хто на іх спадзяецца.
Падобнымі да іх ёсць тыя, што іх робяць, кожны, што спадзяюцца на іх.
Доме Ізраіля, дабраслаўляйце ГОСПАДА! Доме Аарона, дабраслаўляйце ГОСПАДА!
Доме Ізраэля, дабраслаўляйце Госпада; доме Аарона, дабраслаўляйце Госпада;
Доме Левія, дабраслаўляйце ГОСПАДА! Вы, што баіцёся ГОСПАДА, дабраслаўляйце ГОСПАДА!
доме Леві, дабраслаўляйце Госпада; вы, што шануеце Госпада, дабраслаўляйце Госпада!
Дабраслаўлёны ГОСПАД з Сыёну, Які жыве ў Ерусаліме! Альлелюя!
Дабраславёны Госпад з Сіёна, Які жыве ў Ерузаліме. Алілуя.