Псалтыр 97 псалом

Псалтыр
Пераклад Антонія Бокуна → Пераклад Чарняўскага 2017

 
 

ГОСПАД валадарыць! Няхай радуецца зямля, няхай весяліцца мноства астравоў!
 
Госпад заваладарыў! Хай радуецца зямля, хай весяляцца шматлікія астравы.

Хмары і імгла навакол Яго; праведнасьць і суд — падставы пасаду Ягонага.
 
Аблокі і туман — навокал Яго; справядлівасць і закон — гэта падмурак Яго пасаду.

Агонь ідзе перад абліччам Ягоным і паліць наўкола супраціўнікаў Ягоных.
 
Агонь ідзе перад Ім і паліць наўкола Яго непрыяцеляў.

Маланкі Ягоныя сусьвет асьвятляюць; бачыць гэта зямля і дрыжыць.
 
Маланкі Яго асвятляюць сусвет: бачыць і трымціць зямля.

Горы топяцца, быццам воск, ад аблічча ГОСПАДА, ад аблічча Госпада ўсёй зямлі.
 
Горы, як воск, растапляюцца перад Госпадам, перад Госпадам сусвету.

Апавядаюць нябёсы праведнасьць Ягоную, і ўсе народы бачаць славу Ягоную.
 
Нябёсы вяшчаюць справядлівасць Яго, а ўсе народы бачаць Яго хвалу.

Асаромяцца ўсе, што балванам служаць, што ідаламі сваімі хваляцца. Пакланіцеся Яму, усе богі!
 
Хай пасаромяцца ўсе, што пакланяюцца ідалам і што выхваляюцца балванамі сваімі. Пакланіцеся Яму, усе анёлы Яго.

Чуе гэта Сыён і весяліцца, і радуюцца дочкі Юды дзеля судоў Тваіх, ГОСПАДЗЕ!
 
Чуе гэта і весяліцца Сіён, і радуюцца гарады Юды дзеля прысудаў Тваіх, Госпадзе.

Бо Ты, ГОСПАДЗЕ, над усёй зямлёй Найвышэйшы, Ты ўзьнёсься па-над усімі багамі.
 
Бо ты, Госпадзе, праслаўлены на ўвесь свет, надзвычайна ўзвышаешся Ты над усімі багамі.

Вы, што любіце ГОСПАДА, ненавідзьце зло! Ён захоўвае душы багабойных Сваіх, з рукі бязбожных выратоўвае іх.
 
Любіць Госпад тых, што ненавідзяць ліха; сцеражэ Ён душы святых, — з рукі грэшніка вызваліць іх.

Сьвятло ўзыходзіць для праведніка, і радасьць — для шчырых сэрцам.
 
Для справядлівага ззяе святло, і для праўдзівых сэрцам — радасць.

Весяліцеся ў ГОСПАДЗЕ, праведнікі, і слаўце на ўспамін сьвятасьці Ягонай!
 
Цешцеся, справядлівыя, у Госпадзе, і вызнавайце памяць святасці Яго.