Псалтыр 52 псалом
Псалтыр
Пераклад Антонія Бокуна → Пераклад Чарняўскага 2017
Кіраўніку хору. Навучаньне Давіда,
Кіраўніку хору. Маскіль. Давідаў.
калі прыйшоў Даэг Эдомец, і паведаміў Саўлу, і сказаў яму: «Давід прыйшоў у дом Абімэлеха».
Пасля таго, як Даэг эдаміт прыйшоў да Саўла і паведаміў яму, кажучы: «Давід увайшоў у дом Ахімэлеха».
Навошта хвалішся злачынствам, волаце? Міласэрнасьць Божая кожны дзень [трывае]!
Чаго фанабэрышся злосцю, ты, магутны [сваёй] несправядлівасцю?
Загубу выдумляе язык твой; як брытва вострая той, які здраду ўчыняе!
Увесь дзень думаеш пра загубу; язык твой, як вострая брытва, ты, крывадушнік.
Ты любіш ліхое больш, чым добрае; хлусьню гаворыш, а ня тое, што праведнае. (Сэлях)
Любіш ты ліхое больш за добрае, хлусню больш, чым казаць справядлівае.
Любіш усе словы згубныя, о, язык падступны.
Любіш ты розныя пагібельныя словы, хітры язык!
Дзеля гэтага Бог скрышыць цябе назаўсёды, схопіць цябе, і вырве цябе з намёту, і выкараніць цябе з зямлі жывых. (Сэлях)
Таму знішчыць цябе Бог да канца, адпіхне цябе, і выкіне цябе з палаткі, а корань твой — з зямлі жывых.
І ўбачаць праведнікі, і будуць баяцца, і будуць сьмяяцца з яго:
Убачаць справядлівыя і спалохаюцца, і будуць смяяцца з яго:
«Вось чалавек, які ня Бога меў сабе апорай, і спадзяваўся на мноства багацьця свайго, і ўмацоўваўся ў зласьлівасьці сваёй».
«Вось жа чалавек, які не прызнаў Бога сваім прыстанішчам, але надзею сваю паклаў у вялікім багацці сваім, і ўздужэў у злачынствах сваіх».
А я, як аліўка зялёная ў Доме Божым, спадзяюся на міласэрнасьць Божую на вякі вечныя.
А я вось, як аліўка зялёная ў доме Божым. Я паклаў надзею ў міласэрнасці Божай навечна і на векі вечныя.
Буду славіць Цябе на вякі за тое, што Ты ўчыніў, і буду спадзявацца на імя Тваё, бо Ты добры адносна багабойных Тваіх.
Буду Цябе славіць на векі заўсё, што ўчыніў Ты, і буду чакаць імя Твайго, бо яно добрае, перад святымі Тваімі.