Псалтыр 83 псалом
Псалтыр
Пераклад Антонія Бокуна → Пераклад Чарняўскага 2017
Сьпеў. Псальм Асафа.
Песня. Псальм. Асафа.
Божа! Не маўчы, і ня будзь у маўчаньні і ў супакоі, Божа!
Божа, не суцішвайся, не маўчы, не супакойвайся, Божа.
Бо вось, узварухнуліся ворагі Твае, і ненавісьнікі Твае паднялі галаву.
Бо вось, загаманілі Твае непрыяцелі, і тыя, што ненавідзяць Цябе, паднялі галовы.
Супраць народу Твайго яны кнуюць [намеры] таемныя і радзяцца супраць тых, каго Ты ахоўваеш.
Учыняюць яны ліхую нараду супраць Твайго народа, радзяцца супраць тых, каго Ты ўхаваў.
Яны сказалі: «Хадзіце і сатрэм іх між народамі, і імя Ізраіля ня будзе ўзгадвацца болей».
Кажуць: «Ідземце і вынішчым іх з-паміж народаў і хай не ўпамінаецца больш імя Ізраэля».
Бо радзіліся яны аднадумна, супраць Цябе заключылі запавет
Бо надумляюць яны адзінадушна, супраць Цябе ўсталёўваюць пагадненне;
намёты Эдому і Ізмаэльцы, Мааў і Агаране,
у паселішчы ідумеяў і ізмаэльцаў, маабіцян і агарэяў,
Геваль і Амон, і Амалек, Філістынцы і жыхары Тыру.
Гэбал і Амон ды Амалек, край Філістэя, з жыхарамі Тыра.
І Асур далучыўся да іх, стаўся ён рамяном для сыноў Лота. (Сэлях)
Таксама і асірыйцы здружыліся з імі і сталі паплечнікамі Лотавых сыноў.
Зрабі ж Ты ім як Мадыяну, як Сісэры, як Явіну каля ручая Кішон,
Зрабі і гэтым, як зрабіў Мадыяну ці Сісару або Явіну над ручаём Кісон.
якія зьнішчаныя каля Эндору, сталіся як гной на зямлі.
Яны загінулі каля Эн-Дора і сталіся гноем для зямлі.
Учыні з імі, з магнатамі іхнімі як з Арэвам і Зэвам, і з усімі князямі іхнімі, як з Зэвахам і Сальмунам,
З князямі іх учыні падобна, як з Арэбам і Зэбам, як з Зэбахам і Салманам і з усімі іх князямі,
якія казалі: «Возьмем сабе ў спадчыну сялібы Божыя!»
якія сказалі: «Успадкаемім сабе пашу Божую».
Божа мой! Зрабі іх як [пыл у] віхуры, як салому пад ветрам!
Божа мой, зрабі іх падобнымі да кола і быццам саломінку на ветры.
Як агонь паліць лясы і як полымя апальвае горы,
Як агонь, што паліць лес, і як полымя, што абсмальвае горы,
гэтак Ты перасьледуй іх бурай Тваёю і віхурай Тваёй напалохай!
так пераследуй іх грымотамі Сваімі і бураю Сваёй стурбуй іх.
Напоўні сорамам абліччы іхнія, і будуць шукаць імя Тваё, ГОСПАДЗЕ.
Напоўні твары іх сорамам, і няхай прызываюць імя Тваё, Госпадзе.
Няхай будуць асаромленыя і спалоханыя навечна, няхай будуць у сораме і загінуць,
Хай пачырванеюць і збянтэжацца на векі вечныя, і пасаромеюцца, і загінуць,
і даведаюцца, што імя Тваё — ГОСПАД, і толькі Ты — Найвышэйшы над усёй зямлёю.
і хай спазнаюць, што імя Табе — Госпад: Ты адзін — Найвышэйшы над усёй зямлёй.