Псалтыр 83 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Песьня. Псальм Асапавы.
 
Песня. Псальм. Асафа.

Божа! Не маўчы й не аставайся моўчкі ды ў супакоі, о Божа!
 
Божа, не суцішвайся, не маўчы, не супакойвайся, Божа.

Бо вось узварухнуліся ворагі Тваі, і ненавісьнікі Тваі паднялі галаву.
 
Бо вось, загаманілі Твае непрыяцелі, і тыя, што ненавідзяць Цябе, паднялі галовы.

Проці народу Твайго куюць яны замыслы здрадніцкія і змаўляюцца проці тых, каго Ты ахоўваеш.
 
Учыняюць яны ліхую нараду супраць Твайго народа, радзяцца супраць тых, каго Ты ўхаваў.

Яны сказалі: Вось, зьніштожым мы іх, каб яны ня былі больш народам, каб імя Ізраіля не ўспаміналася болей.
 
Кажуць: «Ідземце і вынішчым іх з-паміж народаў і хай не ўпамінаецца больш імя Ізраэля».

Бо ўрадзілі яны аднадушна і змову супраць Цябе ўчынілі:
 
Бо надумляюць яны адзінадушна, супраць Цябе ўсталёўваюць пагадненне;

палаткі Эдомавы ды Ізмайліты, Моаб і Агаране,
 
у паселішчы ідумеяў і ізмаэльцаў, маабіцян і агарэяў,

Гэбал і Аммон і Амаліх, Хвілістыны й жыхары Тыру;
 
Гэбал і Амон ды Амалек, край Філістэя, з жыхарамі Тыра.

і Ассур далучыўся да іх: яны падаюць руку сваю сыном Лотавым.
 
Таксама і асірыйцы здружыліся з імі і сталі паплечнікамі Лотавых сыноў.

Зрабі-ж Ты ім тое самае, што Мадыяму, што Сысары, што Ябіну ля патоку Кіссону,
 
Зрабі і гэтым, як зрабіў Мадыяну ці Сісару або Явіну над ручаём Кісон.

якія зьніштожаны каля Эндору, сталіся гноем дзеля зямлі.
 
Яны загінулі каля Эн-Дора і сталіся гноем для зямлі.

Зрабі Ты з імі, з старшынямі іхнімі, як з Арэбам і Зэбам, ды з усімі князямі іх, як з Зэбам і Салманам,
 
З князямі іх учыні падобна, як з Арэбам і Зэбам, як з Зэбахам і Салманам і з усімі іх князямі,

якія казалі: Заўладаем загонамі Божымі!
 
якія сказалі: «Успадкаемім сабе пашу Божую».

Мой Божа! Зрабі іх, як пыл у віхры, як салома пад ветрам!
 
Божа мой, зрабі іх падобнымі да кола і быццам саломінку на ветры.

Як агонь лясы пажырае і полымя горы апальвае,
 
Як агонь, што паліць лес, і як полымя, што абсмальвае горы,

гэтак жані Ты іх бурай Тваёю і віхрам Тваім напалохай!
 
так пераследуй іх грымотамі Сваімі і бураю Сваёй стурбуй іх.

Напоўні сорамам твар іх, каб іменьня, о Госпадзе, шукалі Твайго.
 
Напоўні твары іх сорамам, і няхай прызываюць імя Тваё, Госпадзе.

Асаром Ты іх ды спалохай навекі, каб у сораме згінулі,
 
Хай пачырванеюць і збянтэжацца на векі вечныя, і пасаромеюцца, і загінуць,

каб пазналі, што імя Тваё — Госпад, ды што Сам Ты над усёй зямлёй Найвышэйшы.
 
і хай спазнаюць, што імя Табе — Госпад: Ты адзін — Найвышэйшы над усёй зямлёй.