Псалтыр 87 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Сыноў Карэявых. Псальм. Песьня. Угрунтаваньне на сьвятых гарах.
 
Сыноў Корэ. Псальм. Песня. Асновы яго — на святых гарах; любіць Госпад

Любіць Госпад брамы Сыонскія больш за ўсе іншыя сялібы Якубавыя.
 
брамы Сіёна больш за ўсе палаткі Якубавы.

Слаўныя рэчы прадказаны аб табе, места Божае! (Зэля)
 
Слаўнае гавораць пра Цябе, горад Божы!

Эгіпт і Бабілён успамяну я прад тымі, што ведаюць мяне; навет Хвілістыны і Тыр з Этыопіяй разам скажуць; той там нарадзіўся.
 
Успомню я Рагаб і Бабілон сярод тых, што ведаюць мяне; вось Філістэя і Тыр з Этыёпіяй: яны нарадзіліся там.

Аб Сыоне-ж будуць казаці: той і той нарадзіўся ў ім, і Госпад яго ўзмацняе.
 
А пра Сіён будуць казаць: «Той і гэты нарадзіўся ў ім; і Сам Найвышэйшы ўмацоўвае яго».

Госпад напіша, сьпісуючы народы: гэты нарадзіўся ў ім. (Зэля)
 
Госпад занясе ў кнігу народаў: «Яны нарадзіліся там».

Дык пяяць аб табе будуць усе чыста сілы жыцьця майго.
 
І будуць спяваць, быццам у карагодзе: «Усе крыніцы мае ў Табе».