Псалтыр 96 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Сьпявайце Гоепаду новую песьню, сьпявайце Госпаду, усенька зямля!
 
Спявайце Госпаду новую песню, спявай Госпаду, уся зямля.

Сьпявайце Госпаду, багаслаўце імя Яго! З дня на дзень абвяшчайце спасеньне Ягонае!
 
Спявайце Госпаду, дабраслаўляйце імя Яго, абвяшчайце з дня ў дзень Яго збаўленне.

Апавядайце між паганамі славу Яго, між усімі народамі цуды Ягоныя.
 
Абвяшчайце між паганамі хвалу Яго, сярод усіх народаў — цуды Яго.

Бо вялікі ёсьць Госпад і годны хвалы, страшней за ўсіх чыста багоў!
 
Бо вялікі ёсць Госпад, і годны хвалы бязмежнай, варты ўшанавання больш за ўсіх багоў.

Бо ўсе богі народаў — нішто, а Госпад нябёсы стварыў.
 
Бо ўсе паганскія багі — марнасць, Госпад жа стварыў нябёсы.

Веліч і краса прад абліччам Яго, сіла й вялікасьць у сьвятыні Ягонай.
 
Велічнасць і прыгажосць перад абліччам Яго, магутнасць і аздоба — у свяцілішчы Яго.

Аддайце Госпаду, плямёны народаў, аддайце Госпаду хвалу і чэсьць!
 
Прыносьце Госпаду, сем’і народаў, прыносьце Госпаду хвалу і магутнасць,

Аддайце Госпаду славу, што іменьню Яго прыналежыць, нясеце дары ды йдзеце ў падворкі Ягоныя.
 
Прыносьце Госпаду хвалу імя Яго. Прыносьце ахвяры і ўваходзьце ў дзядзінец Яго.

Кіньцеся ніцма прад Госпадам у велічы сьвятыні; дрыжыце прад абліччам Яго, усе землі!
 
Пакланіцеся Госпаду са святой урачыстасцю. Трымці перад абліччам Яго, уся зямля.

Кажэце паганам: царуе Госпад! Ён сусьвет умацаваў, каб не пахіснуўся. І будзе судзіць Ён народы па праўдзе.
 
Кажыце сярод народаў: Госпад заваладарыў, бо Ён выправіў сусвет, які не пахіснецца; будзе судзіць Ён народы па справядлівасці.

Хай узьвесяляцца нябёсы і ўзрадуецца зямля; хай мора ўзварухнецца і ўсё, што ў ім.
 
Хай весяляцца нябёсы і радуецца зямля, хай шуміць мора і ўсё, што яго запаўняе.

Хай усьцешыцца ральля і ўсё, што на ёй; і ўзьвесяляцца тады ўсе дрэвы лясныя,
 
Хай цешацца палі і ўсё, што на іх. Тады ўзрадуюцца ўсе лясныя дрэвы,

перад Богам, Які йдзе, Які йдзе судзіці зямлю. Судзіць Ён будзе сусьвет па справядлівасьці і народы паводле праўды Сваёй.
 
перад абліччам Госпада, бо Ён прыходзіць, бо Ён прыходзіць судзіць зямлю. Будзе Ён судзіць сусвет справядліва і народы паводле Сваёй праўды.