Псалтыр 46 псалом
Псалтыр
Пераклад Л. Дзекуць-Малея → Пераклад Чарняўскага 2017
Кіраўніку хору із сыноў Карэявых: на аламот. Песьня.
Кіраўніку хору. Сыноў Корэ. Паводле «Аламот...» Песня.
Бог нам прыпынак і сіла, магутная ў бядзе ўспамога.
Бог — наша прыстанішча і магуцце, хуткі памочнік у нягодах.
Дык не спалохаемся, хоць-бы зямля захісталася і горы ў сэрца мора зваліліся.
Таму не пабаімся, калі б зямля захісталася і горы перанесліся ў сэрца мора.
Хоць-бы раўлі й уздымаліся воды ягоныя, хоць-бы ад шалу ягонага горы трасьліся: з намі Госпад сілаў нябесных, крэпасьць наша — Бог Якубавы. (Зэля)
Хай шумяць і ўздымаюцца яго воды, дрыжаць горы, здрыгануцца горы ў хваляванні Яго.
Патокі рачныя ўзьвесяляюць Божае места, сьвятую сялібу Найвышэйшага.
Воды ракі радуюць горад Божы, святы прыпынак Найвышэйшага.
Бог пасярод яго, дык не захістаецца; Бог вызваліць яго, як настане раніца.
Бог знаходзіцца ў ім, і ён не пахіснецца. Бог дапаможа яму на світанні.
Зварухнуліся народы, захісталіся царствы; Ён падаў голас Свой, і зямля растапілася.
Узбурыліся народы, захісталіся царствы; падаў Ён голас Свой — расцяклася зямля.
Госпад сілаў (нябесных) з намі, крэпасьць наша — Бог Якубавы. (Зэля)
Госпад магуццяў з намі, прыстанішча наша — Бог Якубаў.
Хадзеце ды паўзірайцеся на дзела Госпада: якое спусташэньне зрабіў Ён на зямлі,
Прыходзьце і пабачце справы Божыя, якія дзівосы чыніць Ён на зямлі.
Госпад, што войны спыняе ажно па край зямлі, ламае лукі й рагатыны рассякае, ды паліць агнём вазы.
Ён спыняе войны аж па край зямлі. Ён трэ лукі і ламае зброю, а шчыты паліць агнём.
Спынецеся ды пазнайце, што Я — Бог! Узвышаны Я між народамі, узвышаны на зямлі!
Спачніце і паглядзіце, што Я — Бог: буду ўзнесены Я між народамі і буду ўзнесены Я на зямлі.
Госпад сілаў з намі, крэпасьць наша — Бог Якубавы! (Зэля)
Госпад магуццяў з намі, прыстанішча наша — Бог Якубаў.