Псалтыр 33 псалом

Псалтыр
Пераклад Л. Дзекуць-Малея → Пераклад Чарняўскага 2017

 
 

Псальм Давідавы.Радуйцеся ў Госпадзе, пабожныя; справядлівым выпадае выхваляць Яго.
 
Весяліцеся, справядлівыя, у Госпадзе; справядлівым належыцца пахвала.

Слаўце Госпада на гусьлях, іграйце Яму на арфе дзесяціструннай!
 
Вызнавайце Госпада на гуслях, грайце Яму на псалтыры дзесяціструннай.

Сьпявайце Яму новую песьню; крэпка ўдарайце па струнах пры радасных гуках!
 
Спявайце Яму новую песню, стройна Яму грайце з ускліканнямі.

Бо праўдзівае слова Гасподняе, і ўсе ўчынкі Ягоныя верныя.
 
Бо праўдзівае слова Божае, і ўсе справы Яго верныя.

Праўду і справядлівасьць любіць Ён; ласкай Гасподняй напоўнена зямля.
 
Ён любіць справядлівасць і закон, зямля поўная міласэрнасці Госпада.

Словам Гасподнім створаны нябёсы, подыхам вуснаў Ягоных усе войскі іх.
 
Словам Госпадавым створаны нябёсы і дыханнем вуснаў Яго кожная сіла іх.

Ён воды марскія зьбірае, быццам у мех, Ён кладзе іх на схоў.
 
Быццам у мяшок, збірае Ён воды марскія, у скарбніцах складае бяздонні.

Няхай усенька зямля баіцца Госпада, няхай усе жыхары сусьвету дрыжаць перад Ім.
 
Хай уся зямля баіцца Бога, перад абліччам Яго хай трымцяць усе жыхары свету.

Бо Ён даў загад — і сталася, Ён сказаў — і зьявілася.
 
Бо Ён сказаў, і сталася; Ён загадаў і стварылася.

Госпад разьбіў мяркаваньні паганаў, зьнішчыў замыслы народаў.
 
Госпад разбурае намеры паганаў, пустымі робіць задумы людзей.

Прысуд Гасподні вякі трывае, думкі сэрца Ягонага із роду ды ў род.
 
Намер Госпада трывае павечна, задумы Яго сэрца з роду ў род.

Шчасьлівы народ, Богам якога ёсьць Госпад, — народ, што Ён выбраў на ўласнасьць Сабе.
 
Шчасны той народ, для якога Госпад — гэта Бог, і той народ, які Ён выбраў Сабе ў спадчыну.

З неба Госпад паглядае і бачыць усіх сыноў чалавечых;
 
Госпад глядзіць з неба, бачыць усіх сыноў чалавечых.

з пасаду Свайго Ён глядзіць на ўсіх жыхараў зямлі.
 
Зірнуў Ён з месца Свайго пражывання на ўсіх тых, што насяляюць зямлю.

Сэрца кожнага з іх Ён стварыў, на ўсе ўчынкі іх Ён зважае.
 
Ён, Які ўтварыў кожнаму паасобку сэрцы іх, Які разумее ўсе справы іх.

Ня множствам войска цар перамагае, ня сіла вялікая бароніць волата:
 
Не бывае вызвалены цар вялікай сілай і не вызваліцца волат дзякуючы вялікай сіле сваёй.

ашукаецца той, што жджэ ад каня перамогі, і ня выратуе яго веліч сілы ягонай.
 
Ненадзейны конь для выратавання, і вялізнай сілай сваёй не ўратуе.

Запраўды, вока Гасподняе над тымі, хто баіцца Яго, хто спадзяецца на ласку Ягоную,
 
Вось вочы Госпада над тымі, што Яго баяцца, і да тых, якія спадзяюцца на Яго ласку.

што іх душы ад сьмерці Ён вызваліць, а падчас галадухі жывымі іх захавае.
 
Каб вырваў Ён у смерці душы іх і каб карміў іх у час голаду.

Чакае душа наша Госпада: Ён — помач нам і Ён — шчыт паш.
 
Душа наша мае надзею на Госпада. Ён — наш памочнік і абарона,

Але, у Ім радуецца сэрца нашае; але, мы на імя Яго сьвятое спадзяемся.
 
бо ў Ім узрадуецца наша сэрца, і ў імю Яго мы знайшлі надзею.

Ласка Твая, Госпадзе, хай так будзе над намі, як мы на Цябе спадзяемся!
 
Дык няхай жыве міласэрнасць Твая, Госпадзе, да нас, як і мы ўскладаем надзею на Цябе.