Псалтыр 48 псалом
Псалтыр
Пераклад Антонія Бокуна → Пераклад Чарняўскага 2017
Сьпеў. Псальм сыноў Караха.
Песня. Псальм. Сыноў Корэ.
Вялікі ГОСПАД і вельмі хвалёны ў горадзе Бога нашага, на гары сьвятасьці Сваёй.
Вялікі Госпад і праслаўлены вельмі ў горадзе нашага Бога.
Прыгожае ўзьнясеньне, аздоба ўсёй зямлі, гара Сыён на схілах паўночных, горад вялікага Валадара.
Святая гара Яго, прыгожы ўзгорак — радасць усёй зямлі. Гара Сіён, скрай поўначы, горад вялікага Валадара.
Бог у палацах ягоных вядомы як умацаваны замак [яго].
Бог у дамах яго вядомы зрабіўся як прыстанішча.
Бо вось, валадары сабраліся, падыйшлі грамадою,
Бо сышліся цары, сабраліся, як адзін.
але, угледзеўшы, аслупянелі, спалохаліся, зьбянтэжыліся.
Калі ж самі ўбачылі, так здзівіліся, што стрывожыліся і ўцяклі.
Дрыжаньне ахапіла іх, болі, як у жанчыны, што нараджае.
Страх напаў там на іх і боль, быццам у парадзіхі.
Ты ветрам усходнім скрышыў караблі з Таршышу.
Ветрам усходнім скрышыў Ты караблі Тарсіскія.
Як чулі мы гэта, гэтак і бачылі ў горадзе ГОСПАДА Магуцьцяў, у горадзе Бога нашага. Бог умацаваў яго на вякі. (Сэлях)
Так, як мы спачулі, так і пабачылі ў горадзе Бога Магуццяў, у горадзе нашага Бога, Бог заснаваў яго навек.
Мы разважаем, Божа, пра міласэрнасьць Тваю пасярод сьвятыні Тваёй.
Мы разважаем, Божа, пра Тваю міласэрнасць пасярод святыні Тваёй.
Як імя Тваё, Божа, так і хвала Твая — аж да ўзьмежкаў зямлі; правіца Твая напоўнена праведнасьцю.
Як імя Тваё, Божа, так і хвала Твая — да ўскрайкаў зямлі. Правіца Твая поўная справядлівасці.
Весяліцца гара Сыён, радуюцца дочкі Юды дзеля судоў Тваіх.
Хай весяліцца гара Сіён, хай радуюцца дочкі Юды з прычыны Тваіх судоў.
Станьце наўкола Сыёну, абыйдзіце вакол яго, палічыце вежы ягоныя,
Абыдзіце Сіён наўкола і абдыміце яго, палічыце яго вежы.
прылажыце сэрца сваё да валоў ягоных, агледзьце палацы ягоныя, каб абвясьціць пакаленьням, якія будуць,
Адчуйце сэрцам вашым магуцце яго і прабяжыцеся ўздоўж дамоў яго, каб расказаць іншаму пакаленню.
што гэты Бог ёсьць Бог наш на вякі вечныя, і Ён будзе весьці нас аж да сьмерці.
Бо гэта і ёсць Бог, Бог наш навечна і на векі вечныя; Ён павядзе нас праз вякі.