Псалтыр 54 псалом

Псалтыр
Пераклад Антонія Бокуна → Пераклад Чарняўскага 2017

 
 

Кіраўніку хору: на струнных інструмэнтах. Навучаньне Давіда,
 
Кіраўніку хору. На струнах. Маскіль. Давідаў.

калі прыйшлі Зіфеі і сказалі Саўлу: «Ці ж гэта не Давід схаваўся ў нас?»
 
Пасля таго, як зіфейцы прыйшлі да Саўла, кажучы: «Вось, Давід у нас хаваецца».

Божа, імем Тваім збаў мяне, і магутнасьцю Тваёю вядзі справу маю!
 
Божа, збаў мяне ў імя Тваё і ў магуцці Тваім судзі мяне.

Божа, пачуй малітву маю, прыхілі вуха да словаў вуснаў маіх!
 
Божа, выслухай маё маленне, вушамі ўспрымі словы маіх вуснаў.

Бо чужынцы паўсталі супраць мяне, і моцныя шукаюць душы маёй; яны ня маюць Бога перад сабою. (Сэлях)
 
Бо пыхліўцы падняліся супраць мяне і моцныя шукалі душу маю, і не паставілі яны Бога перад сабою.

Вось, Бог — дапамога мая; Госпад падтрымлівае душу маю.
 
А вось Бог падтрымлівае мяне, Госпад — абаронца душы маёй.

Зьвяртаючыся, зьвернецца ліха на ворагаў маіх. У праўдзе Тваёй Ты вынішчы іх!
 
Павярні ліха на непрыяцеляў маіх і ў праўдзе Тваёй павынішчай іх.

Тады ахвотна буду складаць ахвяры Табе; буду славіць імя Тваё, ГОСПАДЗЕ, бо Ты — добры!
 
Добраахвотна складу я ахвяру Табе, вызнаваць буду імя Тваё, Госпадзе, бо яно добрае;

Бо Ты вызваліў мяне ад усіх трывогаў, і на [загубу] ворагаў маіх глядзелі вочы мае.
 
бо ўратаваў Ён мяне ад усіх бед, і на непрыяцеляў маіх глядзела з пагардай вока маё.