Псалтыр 52 псалом
Псалтыр
Пераклад Яна Станкевіча → Пераклад Чарняўскага 2017
Кіраўніку хору. Навука Давідава.
Кіраўніку хору. Маскіль. Давідаў.
Як прышоў Доіґ Едомлянін, і наказаў Саўлу, і сказаў яму: «Давід прышоў да дому Агімелехавага».
Пасля таго, як Даэг эдаміт прыйшоў да Саўла і паведаміў яму, кажучы: «Давід увайшоў у дом Ахімэлеха».
Чаго ты хвалішся ліхам, дужасіле? ласка Божая ўвесь дзень.
Чаго фанабэрышся злосцю, ты, магутны [сваёй] несправядлівасцю?
Нягоднасьць выдумляе язык твой; як войстрая брытва, робе ашуку.
Увесь дзень думаеш пра загубу; язык твой, як вострая брытва, ты, крывадушнік.
Ты палюбіў ліха болей за дабро і ману болей, чымся гукаць справядлівасьць. Сэля.
Любіш ты ліхое больш за добрае, хлусню больш, чым казаць справядлівае.
Ты палюбіў усі словы кусьлівыя, ашукны языча!
Любіш ты розныя пагібельныя словы, хітры язык!
Але Бог зломе цябе назаўсёды, Ён адатнець і вырве цябе з будану і карэнь твой ізь зямлі жывых. Сэля.
Таму знішчыць цябе Бог да канца, адпіхне цябе, і выкіне цябе з палаткі, а корань твой — з зямлі жывых.
І абачаць справядлівыя, і збаяцца, і пасьмяюцца зь яго:
Убачаць справядлівыя і спалохаюцца, і будуць смяяцца з яго:
«Во чалавек, што не замеў Бога за горад свой, але спадзяецца на множасьць багацьця свайго й мацуецца ў нягоднасьці сваёй».
«Вось жа чалавек, які не прызнаў Бога сваім прыстанішчам, але надзею сваю паклаў у вялікім багацці сваім, і ўздужэў у злачынствах сваіх».
Але я, як зялёнае аліўнае дзерва ў доме Божым, спадзяюся на ласку Божую на векі а векі.
А я вось, як аліўка зялёная ў доме Божым. Я паклаў надзею ў міласэрнасці Божай навечна і на векі вечныя.
Я буду дзякаваць Табе вечна, бо Ты ўчыніў гэта. Я буду спадзявацца на імя Твае, бо яно добрае ў дабрачэсьлівых.
Буду Цябе славіць на векі заўсё, што ўчыніў Ты, і буду чакаць імя Твайго, бо яно добрае, перад святымі Тваімі.