Псалтыр 57 псалом

Псалтыр
Пераклад Яна Станкевіча → Пераклад Чарняўскага 2017

 
 

Кіраўніку хору. Подле «Не загубі». Пісань Давідава, калі ён уцёк ад Саўлы ў пячору.
 
Кіраўніку хору. Паводле «Не руйнуй». Давідаў. Міктам. Калі ён уцёк ад Саўла ў пячору.

Зьмілуйся над імною, Божа, зьмілуйся над імною; бо да Цябе ўцякае душа мая, пад сьцень крылаў Тваіх я ўцякаю, пакуль мінець няшчасьце.
 
Злітуйся нада мною, Божа, злітуйся нада мной, бо ў Цябе шукае абароны душа мая. У засені крылаў Тваіх буду шукаць прытулку, пакуль не міне нядоля.

Я гукаю да Бога Навышняга, да Бога, Каторы поўне імне.
 
Клічу Бога Найвышэйшага, Бога, Які спагадае мне.

Ён пашлець ізь нябёс і выбаве мяне; паганьбе тых, што глытаюць мяне (Сэля); пашлець Бог ласку Сваю а праўду Сваю.
 
Ён сашле з неба і вызваліць мяне, Ён аддасць на ганьбу тых, што тапталі мяне. Сашле Бог міласэрнасць Сваю і праўду Сваю.

Душа мая сярод лявоў, ляжу меж поламяў, меж сыноў людзкіх, каторых зубы — дзіды а стрэлы, і язык іхны — войстры меч.
 
Душа мая ляжыць сярод ільвятаў, што зжыраюць сыноў чалавечых. Зубы іх — зброя і стрэлы, а язык іх — востры меч.

Будзь узвышаны над нябёсы, Божа! над усёю зямлёю чэсьць Твая!
 
Уздыміся, Божа, па-над нябёсы, а слава Твая па ўсёй зямлі.

Яны прыгатавалі сець пад ступы мае; угнулася душа мая; выкапалі яму на мяне, але самы ўваліліся ў яе. Сэля.
 
Наставілі пасткі на ногі мае, і надламілася душа мая; выкапалі дол перада мною, і самі ўваліліся ў яго.

Прыгатавана сэрца мае, Божа, прыгатавана сэрца: я буду пяяць а граць.
 
Прыгатавана сэрца маё, Божа, прыгатавана сэрца маё; буду спяваць і граць псальмы.

Прачхніся, чэсьць мая, прачхніцеся, ліра а гарпа! Я прачхнуся на золку.
 
Прачніся, слава мая, прачніцеся, гуслі і кіфара, я абуджу світанне.

Буду хваліць Цябе, Спадару, мяж людаў; буду граць Табе меж народаў;
 
Буду вызнаваць Цябе, Госпадзе, між народамі, буду спяваць Табе псальмы сярод плямёнаў.

Бо вялікая аж да нябёсаў ласка Твая, аж да булакоў праўда Твая.
 
Бо ўзвысілася да самых нябёсаў міласэрнасць Твая і да самых аблокаў — праўда Твая.

Будзь узвышаны над нябёсы, Божа! над усёю зямлёю чэсьць Твая!
 
Уздыміся, Божа, па-над нябёсы, па ўсёй зямлі — слава Твая.