Псалтыр 19 псалом

Псалтыр
Пераклад Яна Станкевіча → Пераклад Чарняўскага 2017

 
 

Кіраўніку хору. Псальма Давідава.
 
Кіраўніку хору. Псальм Давідаў.

Нябёсы павядаюць славу Божую, і ўчынак рук Ягоных агалашае прасьцяг.
 
Нябёсы абвяшчаюць хвалу Бога, і пра справу рук Яго паведамляе цвярдыня.

Дзень дню пералівае гаворку, і ноч ночы агалашае веданьне.
 
Дзень перад днём прамаўляе слова, і ноч ночы абвяшчае веды.

Нямаш гаворкі ані словаў, каб ня чуць было іх голасу;
 
Няма моў і маўленняў, голас якіх не быў бы чуцён:

Па ўсёй зямлі прайшоў шнюр іхны, і да канца сьвету словы іхныя. Сонцу пастанавіў Ён будан у іх;
 
па ўсёй зямлі загучаў голас іх, і словы іх — аж да ўскрайкаў сусвету.

Яно выходзе, як малады з пад бальдахіму свайго, цешыцца, як дужасіл, прабегшы сьцегавіну сваю.
 
Ён паставіў на іх палатку для сонца, і яно, быццам жаніх, выходзячы з пакоя свайго, цешыцца, як волат перад неабходнасцю прабегчы шлях.

З канца нябёсаў узыход яго, і кручэньне яго да канца іх, і нішто не схавана ад цяпліні яго.
 
Ад ускрайкаў нябёсаў — пачатак шляху яго, і схіл яго — аж да іх ускрайкаў, і няма таго, што ўхілілася б ад цеплыні яго.

Права СПАДАРОВА суцэльнае, наварачаючае душу; сьветчаньне СПАДАРОВА вернае, даець мудрасьць неразумнаму;
 
Закон Госпадаў бязгрэшны, аднаўляе душу, сведчанне Госпада вернае, што надае мудрасць малым.

Загады СПАДАРОВЫ пасьцівыя, вяселяць сэрца; расказаньне СПАДАРОВА чыстае, асьвячае вочы;
 
Прысуды Госпада правільныя, пацяшаюць сэрцы, запавет Госпада светлы, прасвятляе вочы.

Страх СПАДАРОЎ чысты, трывае на векі; суды СПАДАРОВЫ праўдзівыя а справядлівыя ўсі разам;
 
Страх Госпада чысты, трывае на векі вечныя, суды Госпада праўдзівыя і адначасова справядлівыя.

Болей жаданыя за золата, нават за множасьць пералітаванага золата; салодшыя за мёд а каплі наўзы.
 
Яны больш жаданыя за золата і мноства каштоўных камянёў і саладзейшыя за мёд і струмяністыя соты.

Таксама слуга Твой сьцеражоны імі; за дзяржаньне іх вялікая надгарода.
 
Бо слуга Твой удасканальваецца праз іх; у пільнаванні іх — вялікая адплата.

Абмылы свае хто цяме? Ад патайных ачысьці мяне.
 
Хто ж разумее свае аблуды? Ад патаемнага ачысці мяне

Ад самадыйных дзяржы слугу Свайго, няхай яны не запануюць над імною! Тады я буду беззаганны а чысты ад выступу вялікага.
 
і ад пыхі ўпільнуй слугу Твайго, каб не запанавала нада мной. Тады буду я бязгрэшны і ачышчуся ад вялікага злачынства.

Няхай будуць да ўпадабаньня перад відзеньням Тваім гаворкі вуснаў маіх і размышленьне сэрца майго, СПАДАРУ, скала мая й адкупіцелю мой.
 
Няхай жа спадабаюцца словы вуснаў маіх і разважанне сэрца майго перад Табою, Госпадзе, Апякун мой і Збаўца мой!