Псалтыр 82 псалом

Псалтыр
Пераклад Яна Станкевіча → Пераклад Чарняўскага 2017

 
 

Псальма Асафова. Бог вартуе ў збору Божым, сярод багоў судзе:
 
Псальм. Асафа. Бог падымаецца на божым сходзе, пасярод багоў праводзіць суд.

«Пакуль будзеце судзіць несправядліва і шанаваць відзеньні нягодных? Сэля.
 
«Дакуль будзеце судзіць несправядліва і прымаць аблічча грэшнікаў?

Бараніце кволага а сірату, убогага а беднага апраўляйце;
 
Справядліва судзіце няшчаснага і сірату, апраўдвайце прыгнечанага і беднага.

Ратуйце кволага а гарапяку, з рукі нягодных ратуйце яго».
 
Вырывайце беднага і вызваляйце няшчаснага з рукі грэшніка».

Яны ня ведаюць ані сьцямяць, у цемні ходзяць; усі поды зямлі захісталіся.
 
Яны не ведаюць, не разумеюць, ходзяць у цемры; захістаюцца ўсе асновы зямныя.

Я быў сказаўшы: «Вы — багове, і сынове Навышняга — усі вы.
 
Я сказаў: «Вы ўсе — багі і сыны Узвышняга».

Але вы памрыце, як людзі, і паваліцеся, як кажны з князёў».
 
Але ж вы памраце, як людзі, і прыйдзеце ў заняпад, як адзін з князёў.

Паўстань, Божа, судзі зямлю, бо Табе спадуць усі народы.
 
Паўстань, Божа, судзі зямлю, бо Ты маеш права над усімі народамі.