Псалтыр 84 псалом

Псалтыр
Пераклад Яна Станкевіча → Пераклад Чарняўскага 2017

 
 

Кіраўніку хору. На Ґіфскай музыцкай снадзі. Сыноў Корыных. Псальма.
 
Кіраўніку хору. Паводле «Выціскальняў». Сыноў Корэ. Псальм.

Якія любовыя сялібы Твае, СПАДАРУ войскаў!
 
Якія ж мілыя паселішчы Твае, Госпадзе магуццяў!

Стамавалася і нават млее душа мая на панадворках СПАДАРОВЫХ; сэрца мае а цела мае пяюць да Бога жывога.
 
Тужыць і рвецца душа мая ў палац Госпада, сэрца маё і цела маё ўзрадаваліся Богу жывому.

Гэта ж птушка знаходзе дом, і ластаўка гняздо сабе, у каторым выводзе птушаняты свае, нават у ваброчніках Тваіх, СПАДАРУ войскаў, Каролю мой а Божа мой!
 
Нават верабей знаходзіць сабе дом і ластаўка гняздо сабе, каб уладкаваць птушанят сваіх: ахвярнікі Твае, Госпадзе магуццяў, Валадару мой і Божа мой!

Шчасьлівыя жывучыя ў доме Тваім: яны яшчэ будуць выхваляць Цябе. Сэля.
 
Шчасныя тыя, што жывуць у доме Тваім: век будуць яны славіць Цябе.

Шчасьлівы чалавек, каторага сіла ў Табе, і сьцежкі Твае ў сэрцу іхным.
 
Шчасны той чалавек, у якога ёсць успамога ад Цябе; размясціў ён у душы нябесныя шляхі:

Праходзячыя даліною плачу абарачаюць яе ў жарало; таксама дабраславенствамі яна пакрыта, як раньнім дажджом;
 
Праходзячы сухой лагчынаю, яны робяць яе крыніцаю, бо ранні дождж дабраславеннем зросіць яе.

Ходзяць ад сілы да сілы, кажны паказуецца перад Богам на Сыёне.
 
Пойдуць яны з сілы ў сілу, убачыцца [імі] Бог багоў на Сіёне.

СПАДАРУ, Божа войскаў! пачуй малітву маю, нахіні вуха, Божа Якаваў. Сэля.
 
Госпадзе, Божа магуццяў, выслухай малітву маю; прыхіні вуха, Божа Якубаў.

Шчыце наш, глянь, Божа, а прыгледзься да віду памазанца Свайго;
 
Глянь, Божа, наш абаронца, ды глянь на аблічча намашчэнца Твайго!

Бо лепш дзень у панадворках Тваіх, як тысяча ў іншых. Валей буду сядзець у парозе дому Бога Свайго, чымся жыць у буданох нягоднасьці.
 
Бо мілейшы адзін дзень у палатцы Тваёй за тысячу! Хачу лепш стаяць на парозе дома Бога майго, чым жыць у палатках грэшнікаў.

Бо сонца а шчыт СПАДАР Бог, СПАДАР даець ласку а чэсьць, не адмаўляе дабра тым, што ходзяць пасьціва.
 
Бо Госпад Бог ёсць сонца і шчыт; ласку і славу дасць Госпад; Ён не забярэ дабра ў тых, што жывуць у бязвіннасці.

СПАДАРУ войскаў! дабраславёны чалавек, што спадзяецца на Цябе.
 
Госпадзе магуццяў, шчасны той чалавек, які ўскладае надзею на Цябе!