Псалтыр 8 псалом
Псалтыр
Пераклад Яна Станкевіча → Пераклад Чарняўскага 2017
Кіраўніку хору. На Ґіфскай снадзі. Псальма Давідава.
Кіраўніку хору. На мелодыю песні “Выціскальні...” Псальм Давідаў.
СПАДАРУ, Спадару наш, якое вялікаснае імя Твае на ўсёй зямлі! Ты даў славу Сваю на нябёсах.
Госпадзе, Госпад наш, якое ж дзівоснае імя Тваё па ўсёй зямлі, бо слава Твая ўзнялася вышэй нябёсаў.
З вуснаў дзецянят а сысуноў Ты залажыў хвалу напярэк уцісканьнікам, каб уцішыць ворага а помсьніка.
Праз вусны дзяцей і немаўлят учыніў Ты хвалу дзеля ворагаў Тваіх, каб утаймаваць ворага і мсціўцу.
Як я аглядаю нябёсы Твае, — работу палцаў Тваіх, месяц а гвезды, каторыя Ты ўладзіў,
Калі бачу нябёсы Твае, твор пальцаў Тваіх, месяц і зоркі, якія Ты заснаваў, —
То што людзіна, што Ты помніш яе, і сын людзкі, што Ты давядаешся да яго?
то што ж ёсць чалавек, што Ты памятаеш пра яго, або сын чалавечы, што Ты адведваеш яго?
Ты зьменшыў мала яго супроці ангілаў, і славаю а сьцёю каранаваў яго;
Мала панізіў Ты яго за анёлаў, славаю і пашанаю ўвянчаў яго,
Даў яму панаваньне над работаю рук Сваіх; усе палажыў пад ногі яму;
і паставіў яго над стварэннямі рук Тваіх, і ўсё Ты кінуў пад ногі яго, —
Авечкі а валы ўсі, а таксама палявыя зьвяры,
авечак і быкоў усіх, і ў дадатак звяроў палявых,
Птушкі нябёсныя й рыбу морскую, морскімі дарогамі праходзячую.
птушак нябесных ды рыб марскіх, і ўсё, што ходзіць па шляхах марскіх.
СПАДАРУ, Спадару наш, якое вялікаснае імя Твае на ўсёй зямлі!
Госпадзе, Госпад наш, якое ж дзівоснае імя Тваё па ўсёй зямлі!