Псалтыр 60 псалом

Псалтыр
Пераклад Яна Станкевіча → Пераклад Чарняўскага 2017

 
 

Кіраўніку хору. На Шушан-Едуф. Пісань Давідава, да навукі,
 
Кіраўніку хору. Паводле «Лілея закону». Міктам. Давідаў. Дзеля павучання.

Як ён ваяваў із Сыраю Месопотамскаю а із Сыраю Цоўскаю, і зьвярнуўся Ёаў, і пабіў Едома ў даліне Салонай двананцаць тысячаў.
 
Калі ён выступіў супраць Арам-Нагараім і Арам-Соба, і калі Ёас, вярнуўшыся, перамог Эдом у Саляным лагу: дванаццаць тысяч [чалавек].

Божа! Ты пакінуў нас, зламіў нас, Ты загневаўся; зьвярніся да нас.
 
Адпіхнуў Ты нас, Божа, зруйнаваў нас. Ты раззлаваны. Павярніся да нас.

Ты патрос зямлю, раськяпіў яе: уздараві яе шчэліны, бо яна хістаецца.
 
Ты страсянуў зямлёю, расшчапіў яе; загаі шчыліны яе, бо хістаецца.

Ты паказаў цяжкасьці люду Свайму, Ты напаіў нас віном дурнячым.
 
Паказаў Ты народу Твайму цяжкасці, напаіў нас віном зменлівасці.

Тым, што баяцца Цябе, Ты даў харугаў, каб паднялі яе дзеля праўдзівасьці (Сэля),
 
Тым, хто баіцца Цябе, Ты даў знак, каб уцякалі яны ад лука.

Каб вывальніліся любовыя твае. Памажы правіцаю Сваёю і адкажы нам!
 
Каб уцалелі, успамажы нам правіцаю Тваёй і выслухай нас.

Бог казаў у сьвятасьці Сваёй: «Узрадуюся, падзялю Шыхем і даліну Сукофскую памераю.
 
Прамовіў Бог у святыні Сваёй: «Узвесялюся і парозню Сіхэм і памераю лагчыну Сукот.

Ґілеад Мой, і Манас Мой, і Яхрэм сіла галавы Мае, Юда правадаўца Мой,
 
Мой Галаад і мой Манаса, а Эфраім — цвярдыня галавы маёй. Юда — жазло маё.

Моаў мыйніца Мая, на Едома кіну бот Свой. Над Пілістаю буду гукаць».
 
Мааб — посуд мой для мыцця, на Эдом пастаўлю чаравік мой, па-над Філістэяй узнясу покліч мой».

Хто ўвядзець мяне ў умацаванае места? хто завядзець мяне аж да Едому?
 
Хто завядзе мяне ў горад абаронны? Хто адвядзе мяне аж да Эдома?

Ці ня ты, Божа, пакінуў нас, і ня выходзіш, Божа, у войсках нашых?
 
Ці ж не Ты, Божа, Які адрынуў нас, ці ж не ўзвысішся Ты, Божа, сярод магуццяў нашых?

Падай нам памогу супроці ворага, бо дарма людзкі ратунак.
 
Дай нам успамогу ў бядзе, бо марнае збаўленне людское.

У Богу і мы будзем дзеяць адважна, Ён патопча варагоў нашых.
 
З Богам учынім мы магутнасць, і Ён стопча пераследнікаў нашых.