Псалтыр 26 псалом

Псалтыр
Пераклад Яна Станкевіча → Пераклад Чарняўскага 2017

 
 

Давідава. Судзі, СПАДАРУ, мяне, бо я хадзіў у беззаганнасьці сваёй і на СПАДАРА спадзяваўся; не пахіснуся.
 
Давідаў. Прызнай мне, Госпадзе, справядлівасць, бо пачаў я хадзіць у бязвіннасці сваёй і не саслабею, спадзеючыся на Госпада.

Выпрабуй, СПАДАРУ, мяне, спакусі мяне, пералітуй ныркі мае а сэрца мае;
 
Выпрабуй мяне, Госпадзе, і ўчыні мне іспыт, растапі [мне] вантробы мае і сэрца маё.

Бо ласка Твая перад ачыма маімі, і хаджу я ў праўдзе Тваёй.
 
Бо міласэрнасць Твая ў мяне перад вачамі, і жыву я ў праўдзе Тваёй.

Я не сядзеў ізь сьмяротнікамі марнымі і з тымі, што прыдаюцца, не пайду.
 
Не сядзеў я разам з мужамі марнымі, і не ўвайду разам з тымі, што дзейнічаюць спадцішка.

Ненавіджу грамаду ліхадзеяў і зь нягоднымі ня сяду.
 
Узненавідзеў я зборышча злачынцаў і з бязбожнікамі разам не сядаю.

Абмываю ў нявіннасьці рукі свае й абходжу аброчнік Твой, СПАДАРУ,
 
У знак нявіннасці абмыю я рукі мае і абыду кругом ахвярнік Твой, Госпадзе,

Каб агалашаць голас удзячнасьці й абяшчаць усі дзівы Твае.
 
каб адкрыць для вушэй воклічы хвалы і паведаміць пра ўсе дзівосы Твае.

СПАДАРУ, люблю я сялібу дому Твайго і месца, ідзе жывець чэсьць Твая.
 
Палюбіў я прыстанішча дому Твайго і месца пражывання хвалы Тваёй.

Ня лучы з грэшнікамі душы мае ані зь людзьмі крыві жыцьця майго,
 
Не губі з бязбожнікамі душы маёй і з мужамі крыважэрнымі — жыцця майго.

У чыіх руках благоцьце і чыя правіца поўная лапаноў.
 
На руках іх ліхадзействы, правіца іх поўная хабараў.

А я ў беззаганнасьці сваёй хаджу; выбаві мяне й зьмілуйся над імною.
 
Я ж пачаў хадзіць у нявіннасці сваёй, збаў мяне і пашкадуй мяне.

Нага мая стаіць на роўным месцу; у зборах дабраслаўлю СПАДАРА.
 
На роўнай дарозе стаіць мая нага, славіць буду Госпада ў святынях.