Псалтыр 65 псалом
Псалтыр
Пераклад Л. Дзекуць-Малея → Пераклад Антонія Бокуна
Кіраўніку хору: псальм Давідавы. Дзеля пяяньня.
Кіраўніку хору. Псальм Давіда. Сьпеў.
На Цябе надзея, Табе, о Божа, хвала на Сыоне; няхай споўнены будуць Табе абяцаньні.
Табе, Божа, прыналежыць хвала на Сыёне; і Табе будуць споўненыя абяцаньні.
Ты, што чуеш малітву, — да Цябе ўсё жывое імкнецца.
Ты чуеш малітву, да Цябе ўсякае цела імкнецца.
Віны мае перамаглі мяне; але Ты пакрываеш праступкі нашы.
Справы беззаконныя перамаглі мяне, але Ты дараваў нам правіны нашыя.
Шчасьце таму, каго выбраў Ты і прыблізіў, каб жыў ён у сенях Тваіх; насычаціся будзем дабром Твайго дому, сьвятога храму Твайго.
Шчасьлівы той, каго Ты выбраў і наблізіў, каб жыў ён на панадворках Тваіх; мы будзем насычацца даброцьцем Дому Твайго, сьвятой сьвятыні Тваёй.
Страшнымі ўчынкамі даеш нам адказ паводле Тваёй справядлівасьці, Божа, — Ты, што ёсьць наша спасеньне, усіх канцоў сьвету й далёкага мора надзея!
Страшнымі [ўчынкамі] ў праведнасьці Ты адказваеш нам, Божа збаўленьня нашага, пэўнасьць усіх канцоў зямлі і далёкага мора,
Што ўгрунтаваў Сваёй сілаю горы і моцаю падперазаўся.
Які ўгрунтаваў горы сілаю Сваёй, Які падперазаны магутнасьцю,
Што ўсьцішаеш шум мора, шум хваляў ягоных і хваляваньне народаў.
Які суцішае шум мора, шум хваляў ягоных і мноства народу.
Дык жыхары канцоў сьвету далёкіх баяцца знаменьняў Тваіх: землі на ўсходзе й на захадзе Ты славіць Цябе пабуджаеш.
І будуць баяцца знакаў Тваіх жыхары канцоў сьвету, землі на ўсходзе і на захадзе Ты разьвесяляеш.
Ты адведаў зямлю й напаіў яе; Ты яе ўзбагачаеш мнагаводным Божым патокам. Ты прыгатоўваеш хлеб для яе, бо гэтак спасобіш зямлю.
Ты наведаў зямлю і напаіў яе, Ты ўзбагаціў яе Божым струмянём, напоўненым водамі. Ты прыгатаваў збожжа на ёй, бо гэтак угрунтаваў яе.
Ты навадняеш разоры яе і скібы яе разрыхляеш, дажджовымі кроплямі яе разьмякчаеш, багаславіш яе ўраджаі.
Ты насычаеш разоры яе і разраўноўваеш скібы яе, кроплямі дажджу разьмякчаеш яе, парастак яе дабраслаўляеш.
Ты год завяршаеш дабратою Тваёй, і тукам сьцежкі Твае аплываюць.
Ты ўкаранаваў год дабром Тваім, і сьцежкі Твае разьліваюць тлустасьць,
Парастаюць буйна пожні і стэпы, і ўзгоркі радасьцяй падпяразваюцца.
разьліваюць на пашы ў пустыні, і ўзгоркі падпярэзваюцца радасьцю,
Пасьвішчы стадамі авец апранаюцца, і даліны атулены жытам: і радасна міжы сабой гукаюць, і песьні пяюць.
апранаюцца ў чароды авечак, і даліны атуляюцца збожжам, радасна гукаюць і сьпяваюць.
