Псалтыр 47 псалом
Псалтыр
Пераклад Л. Дзекуць-Малея → Пераклад Антонія Бокуна
Кіраўніку хору із сыноў Карэявых: псальм.
Кіраўніку хору. Сыноў Караха. Псальм.
Ляскайце далоньмі, усе народы, сьпявайце Богу з радасьці вялікае!
Усе народы, пляскайце рукамі, усклікайце Богу голасам радасьці!
Бо страшны Госпад Найвышэйшы, вялікі Цар над усенькай зямлёй.
Бо страшны ГОСПАД Найвышэйшы, Валадар вялікі над усёй зямлёю.
Ён пакарыў нам народы й паганаў пад ногі нашыя.
Ён скарыў народы, і [кінуў] паганаў пад ногі нашыя.
Ён выбраў для нас нашу спадчыну, красу Якуба, якога Ён палюбіў. (Зэля)
Ён выбраў для нас спадчыну нашую, гонар Якуба, якога Ён палюбіў. (Сэлях)
Узьнёсся з крыкам радасьці Бог, Госпад пры гуках трубных.
Узьняўся Бог з гукам гучным, ГОСПАД [узьняўся] пры голасе трубы.
Слаўце Бога, слаўце! Выслаўляйце Цара нашага, выслаўляйце!
Выслаўляйце Бога, выслаўляйце! Выслаўляйце Валадара нашага, выслаўляйце!
Бо Бог ёсьць Цар над усенькай зямлёй; сьпявайце-ж мудра.
Бо Валадар над усёй зямлёй — [гэта] Бог; выслаўляйце [Яго] з разуменьнем.
Бог царыць над усімі паганамі; Бог уссеўся на сьвятым пасадзе Сваім.
Валадарыць Бог над усімі народамі; Бог сядзіць на пасадзе сьвятасьці Сваёй.
Шляхотныя спасярод народаў сабраліся да народу Бога Аўраамавага, бо шчыты на зямлі — Божыя; Ён высака ўзвышан.
Магнаты народаў сабраліся разам з народам Бога Абрагама, бо шчыты зямлі — Божыя; Ён высока ўзьняты.
