Псалтыр 65 псалом

Псалтыр
Пераклад Чарняўскага 2017 → Пераклад Антонія Бокуна

 
 

Кіраўніку хору. Псальм Давідаў. Песня.
 
Кіраўніку хору. Псальм Давіда. Сьпеў.

Божа, Ты варты гімна на Сіёне; і перад Табой хай споўніцца абяцанне ў Ерузаліме.
 
Табе, Божа, прыналежыць хвала на Сыёне; і Табе будуць споўненыя абяцаньні.

Ты выслухоўваеш малітвы; да Цябе прыходзіць кожнае цела з-за грахоў,
 
Ты чуеш малітву, да Цябе ўсякае цела імкнецца.

і нават пры цяжары бязвер’я нашага Ты спагадаеш нам.
 
Справы беззаконныя перамаглі мяне, але Ты дараваў нам правіны нашыя.

Шчасны той, каго Ты абярэш і прымеш; будзе жыць ён у палацах Тваіх. Мы напоўнімся дабротамі дому Твайго, святасцю святыні Тваёй.
 
Шчасьлівы той, каго Ты выбраў і наблізіў, каб жыў ён на панадворках Тваіх; мы будзем насычацца даброцьцем Дому Твайго, сьвятой сьвятыні Тваёй.

Дзівосным чынам у справядлівасці Ты пачуеш нас, Божа збаўлення нашага, надзея ўсіх канцоў зямлі і далёкага мора.
 
Страшнымі [ўчынкамі] ў праведнасьці Ты адказваеш нам, Божа збаўленьня нашага, пэўнасьць усіх канцоў зямлі і далёкага мора,

Ты — што ўмацоўваеш горы магуццем Тваім, апярэзаны сілаю.
 
Які ўгрунтаваў горы сілаю Сваёй, Які падперазаны магутнасьцю,

Ты — што глушыш шум мора, шум хваль яго і бунт народаў.
 
Які суцішае шум мора, шум хваляў ягоных і мноства народу.

І будуць баяцца тыя, што насяляюць межы зямлі, знакаў Тваіх; ускрайкі ўсходу і захаду Ты пацешыш.
 
І будуць баяцца знакаў Тваіх жыхары канцоў сьвету, землі на ўсходзе і на захадзе Ты разьвесяляеш.

Наведаў Ты зямлю і навадніў яе, узбагаціў Ты яе разнастайна. Ручай Бога поўны водамі; уладкаваў Ты хлеб іх, бо так уладкаваў Ты яе.
 
Ты наведаў зямлю і напаіў яе, Ты ўзбагаціў яе Божым струмянём, напоўненым водамі. Ты прыгатаваў збожжа на ёй, бо гэтак угрунтаваў яе.

Ты — што барозны яе вадою поіш, Ты — што глебу яе раўняеш; Ты змягчаеш яе дажджамі, дабраслаўляеш яе пладамі.
 
Ты насычаеш разоры яе і разраўноўваеш скібы яе, кроплямі дажджу разьмякчаеш яе, парастак яе дабраслаўляеш.

Ты ўвянчаў год дабром Тваім, і сляды Твае будуць струменіцца тлушчам.
 
Ты ўкаранаваў год дабром Тваім, і сьцежкі Твае разьліваюць тлустасьць,

Будуць струменіцца пустынныя выганы, і ўзгоркі апяражуцца радасцю.
 
разьліваюць на пашы ў пустыні, і ўзгоркі падпярэзваюцца радасьцю,

Лугі апрануліся ў авечак, і лагчыны напоўняцца хлебам; будуць усклікаць яны і гімн [Табе] заспяваюць.
 
апранаюцца ў чароды авечак, і даліны атуляюцца збожжам, радасна гукаюць і сьпяваюць.